Etnoroka grupa “Laimas Muzykanti” sovā jubileja godā īt pi klauseituoju ar jaunu koncertprogramu “Atdot tautai tautasdziesmu”.

Naseņ atsagrīzuši nu leluokuo Centraluos Azejis muzykys festivala “Sharq Taronalari” Uzbekistanā, etnoroka grupa “Laimas Muzykanti” izsludynoj 20 godu jubileja koncertu sereju Latvejā.

Koncertūs pīsadaleis ari grupys ilggadieja dalineica, Latvejis etnomuzykys personeiba Kristīne Kārkle, nu eipašū gostu statusā byus 80. – 90. godu legenda – grupa “Elpa”, kurys dalinīki itūgod otkon ir apsavīnuojuši tik dažim koncertim.

“Nazkod tauta ir saceriejuse dzīsmis. Sleipiejuse tuos godu symtim caur paaudzem da briljanta myrdzumam. Piec tam daudzys nu tūs pagaisynuojuse. Palyka viņ dažys, kū jautrā kompanejā padzīduot, tok leluokajai daļai nu tūs, bīži viņ pyrmais panteņš – moza briljanta škautneite tik atmiņā palykuse. Ceru, ka myusu koncertā kotrs, kurs atīs, varēs atrast sovu briljantu,” uzsver grupys “Laimas Muzykanti” līders Artūrs Uškāns.

Grupa “Elpa” sovukuort duovuos klauseituojim sovu “zalta arhivu” – “Senā dziesma”, “Ezerā”, “Gan es tevi izauklēšu” i cytys legendarys dzīsmis.

“Piec grupys “Elpa” līdera Juoņa Logina aizīšonys myužeibā i grupys izjukšonys 90. godu suokuos kotrys nu atlykušūs grupys dalinīku kaidu laiku ir dorbuojīs ari etnoroka grupā “Laimas Muzykanti”. Nu sovys pīredzis varu kategoriski apgolvuot, ka tī ir augstuokuos raudzis muziki, kaidus Latvejā viņ var dzierdēt. Tys ir lels gūds, ka “Elpa” pīkryta byut gosti myusu koncertūs,” pībylst Artūrs Uškāns.

“Laimas Muzykantu” 20 godu jubileja koncerti nūtiks Rēzeknē, Latgolys viestnīceibā GORS (16. oktobrī), Līpuojā, LOC Rūžu zalā (30. oktobrī) i Jelgovys Kulturys nomā (8. novembrī).

Beleti iz koncertie jau pīejami vysuos “Biļešu paradīzes” kasēs, kai ari škārsteiklā.