Pabeigta  projekta “Vecticībnieku   vēsturiskās   apbūves   atjaunošana  un  lauksaimniecības  kultūrvēsturiskā   mantojuma saglabāšana  Slutišķu sādžā” izpiļde, informej Daugovpiļs nūvoda Kulturys puorvaļdis vadeituoja Ināra Mukāne.

2014. godā Daugovpiļs nūvoda Kulturys puorvaļdē tyka izsuokta Eiropys Lauksaimisteibys fonda lauku atteisteibai Latvejis Lauku atteisteibys programys 2007. – 2013. godam pasuokuma “Lauku mantojuma saglabāšana un atjaunošana” projekta “Vecticībnieku vēsturiskās apbūves atjaunošana un lauksaimniecības kultūrvēsturiskā mantojuma saglabāšana Slutišķu sādžā”  eistynuošona.

Projekta mierkis beja Naujinis Nūvodpietnīceibys muzeja ekspozicejis “Slutišķu vecticībnieku lauku sēta” kuormu renovaceja i jaunys ekspozicejis “Zemkopības darbarīki Daugavpils novadā 20. gadsimta 1.pusē” izveide. Slutišku staraveru lauku sāta ir vīneigais taida veida muzeja objekts Latvejā, kas atsarūn autentiskā apdzeivuotā cīmā i kur apmaklātuoji var īsapazeit ar unikalim Latgolys staraveru goreiguos i sadzeivis kulturys materialim. Ekspozicejis kuormi ir tautys byuvnīceibys paraugi ar daudzom dekorativom kūka detaļom, lūgu apmaļu i lūdzinīku rūtuojumim, uordurovu viriņu veiduojumim.

Vairuokys Slutišku sātys byuvis, kuormu kūka detalis beja nūsalītuojušys i pat pagaisušys, partū projekta ītvorūs vysu pyrma tyka organizāts īpierkums par tehniskuo projekta izstruodi i objekta viesturiskū izpieti. Pasyutejuma izpiļdeituojs – SIA “Arhitekta L. Šmita darbnīca” veice padzilinuotu Slutišku sātys kulturviesturiskū inventarizaceju i arhitektoniski muokslinīciskū izpieti. Gaisušī saimisteibys kuormi tyka atjaunuoti, vodūtīs piec karteņu i cytu viesturis olūtu, sasaglobuojušuos klāva akmiņa sīnys i greida tyka restaurātys. Dzeivuojamajā sātā, kas beja vyslobuok sasaglobuojuse, tyka veikti nūzeimeigi byuvnīceibys i restauracejis dorbi – jumta saguma, lūgu, greidu, guļbyuvis vaiņuku nūmaiņa, durovu, lūgu apmaļu, sātys dekorativūs elementu atjaunuošona, pogroba remonts. Lobīkuortuošonys projektā tyka atjaunuots viesturiskais slāgtais pogolms ar kūka žūgu i vuortim. Pogolmā izrokta oka ar svērti. Uorpus viesturiskuo pogolma izveiduota teritoreja apmaklātuoju vajadzeibom ar nalelu mašynu stuovvītu i lobīreiceibom.

Byuvnīceibys dorbi tyka veikti, lītojūt tautys celtnīceibys prasmis i tradicionalūs materialus. Syltumizolacejai  tyka izmontuotys syunys, sovukuort mitruma izolacejai – bārza tuoss.

Jaunuos ekspozicejis īkuortuošonai  tyka veikta 16 muzeja prīškmatu restauraceja i 12 jaunu prīškmatu izgataveišona, izvītuoti  informacejis stendi.