Latgolys Kulturviesturis muzejs i Latgolys muokslinīku kūpa 20. godu piec kuortys aicynoj Latgolys profesionalūs, aktivi struodojūšūs i studiejūšūs jaunūs muokslinīkus pīsadaleit tradicionalajā muokslys izstuodē “Rudens 2015”.

Da 2015. goda 11. novembra Latgolys Kulturviesturis muzejā (Atbreivuošonys alejā 102, Rēzeknē) juoīsnādz pādejuo goda laikā radeitī tāluotuojmuokslys dorbi (gleznīceibys, grafikys, tielnīceibys, tekstildorbi i cyti), īprīšk dorbu īsnīgšonu dasokūt, zvonūt 64622464 voi 29175532 (Inese Dundure, Latgolys Kulturviesturis muzeja Muokslys nūdalis vadeituoja).

Kai informej pošvaļdeibys agenturys “Rēzeknes Kultūras un Tūrisma centrs” puorstuove Maija Upeniece, īsnīgtūs muokslys dorbus eksponiešonai izviertēs žūreja. Sovukuort piec izstuodis, pasasokūt Rēzeknis piļsātys dūmis atbolstam, vairuoki žūrejis īsaceitī dorbi tiks īpierkti muzeja kruojumā, kas kotru godu papyldynoj myusu dīnu Latgolys muokslys kolekceju.

Latgolys muokslinīku dorbu izstuodis “Rudens 2015” atkluošona Latgolys Kulturviesturis muzejā tradicionali nūtiks eisai pyrma Latvejis dzimšonys dīnys – 17. novembrī 14.00.

Karteņa nu “Rēzeknes Kultūras un Tūrisma centra” arhiva