23. martā Upeitis pamatškolā i Upeitis Tautys nomā devenis bārnu i jaunīšu folklorys kūpys saliduoja iz Kūkovys nūvoda bārnu i jaunīšu folklorys svātkim „Lidu, lidu vanadzini…”, kas beja atlasis pasuocīņs pyrma starptautiskuo festivala „Pulkā eimu, pulkā teku”. Itymā godā festivala tema ir putyni. Iz folklorys svātkim beja sabraukuši i saguojuši vaira kai 160 dalinīki i skateituoji.

Dīna īsasuoka jau 11:00, kod Upeitis pamatškolā bārni varēja īvingrynuot rūkys dažaiduos meistardarbneicuos: filcēja vilnys sumkys, vuoreja sīra i neja svīksta, taiseja papeira krellis i putynus, vuicejuos aust vilnys skustus. Meistardarbneicys vadeja Sandra Valaine, Irēna Slišāne, Aija Korneja, Irēna Romka, Sandra Bukša, Ligita Spridzāne i Ramona Korneja.

Apgivuši daižaiduos prasmis vysi devēs iz Upeitis Tautys nomu, kur kotra kūpa gon dzīduoja, gon doncuoja. Svātku laikā ari tyka izviertieti individualī tradicionalūs dzīšmu dzīduotuoji, skolu liecieji, dvīļu daņču doncuotuoji i puoru daņču doncuotuoji. Lobuokī piec žurejis viertiejuma 28. aprelī brauks iz Reigu, iz nacionalū finalu. Kai ari vysys kūpys nūpeļneja ceļa zeimi iz starptautiskū bārnu i jaunīšu folklorys festivalu „Pulkā eimu, pulkā teku”.

Svātku dalinīki vysi nūpeļneja svātku nūzeimeiti, kū ilustrējis Upeitis pamatškolys 2. klasis školāns Domeniks Slišāns.

Svātkūs vysus īprīcynuoja Upeitis bārni, atdarynojūt dažaidu putynu skonus. Upeitis jaunīši i Brīžucīma jaunīši sadoncuoja dažaidus daņčus i dzīduoja spieceigys dzīsmis. Baļtinovys kapela īskandynuoja vysu zalu ar daudzejim skripku skonim. Rekovys bārni dzīduoja i muzicieja ar dažaidim pošu gataveitim instrumentim. Tilžys bārni gon skaneigi dzīduoja, gon ruodeja rūtalis. Bolvu pamatškolys bārni vysus puorsteidze ar ļusteigom putynu meiklem, Kupravys bārni gon skaiški dzīduoja, gon spēlēja dažaidus muzykys instrumentus. Svātku golā dažaidūs daņčūs vysus izdancynuoja Rēzeknis folklorys draugu kūpa „Vīteri”.

Svātkūs pīsadaleja:

1. Upeitis jaunīšu folklorys kūpa „Upīte”, vadeituojs Andris Slišāns
2. Upeitis bārnu folkorys kūpa, vadeituoja Irēna Slišāne
3. Rekovys vydsškolys bārnu folklorys kūpa, vadeituoja Daina Pužule
4. Brīžucīma bārnu i jaunīšu folklorys kūpa „Soldanī”, vadeituoja Anita Pakalnīte
5. Bolvu pamatškolys kūpa „Maza torte”, vadeituoja Svetlana Pavlovska
6. Baļtinovys muzykys i muokslys školys kapela, vadeituoja Ilona Bukša
7. Tilžys vydsškolys bārnu folklorys kūpa, vadeituoja Daiga Jēkabsone
8. Kupravys pamatškolys ansamblis „Strautiņš”, vadeituoja Ņina Baikova
9. Rēzeknis draugu folklorys kūpa „Vīteri”, vadeituoja Sandra Stare

Dalinīkus viertēja žureja:

1. Sandra Ločmele – Vileks nūvoda kulturys metodike
2. Inita Roginska – Viduču pamatškolys muzykys školuotuoja
3. Sandra Stare – folklorys kūpys „Vīteri” vadeituoja
4. Ilmārs Dreļs – dzigu kūpys „Dziga” vadeituojs

Lela prīca par meilu kūpā byušonu, jaukim cylvākim i ļusteigi, satureigi provest laiku.

Lels paļdis pasuocīņa atbaļsteituojim, bez kuru svātki nabyutu saguojuši: Vaļsts Kulturkapitala fondam, Vileks nūvoda dūmei i SIA „DOLO”.

Upeitis Tautys noma vadeituojs Andris Slišāns

Kartenis – Kūkovys nūvoda bārnu i jaunīšu folklorys svātki „Lidu, lidu vanadzini…”