Atzeimojūt ANO izsludynuotū Storptautyskū 16 dīnu kampaņu vardarbeibys pret sīvīti nūviersšonai i gatavejūtīs Zvīdru dīnom Rēzeknē, Centrs MARTA sadarbeibā ar Zvīdrejis viestnīceibu Latvejā organizej projektu “Septiņi” – dokumentalys lugys izruodi, kurei sajāmuse pasauļa atzineibu.

“Septiņi” ir zvīdru radeits socials projekts – dokumentala izruode. Projekta autoru ideja, izvadūt laikmeteigū lugu daudzvīt pasaulī, ir akteru lūmuos aicynuot vītejā sabīdreibā cīnejamys autoritatis – politikus i sabīdryskūs darbinīkus.

Luga ir stuosts par septeņu sīvīšu (Afganistanys, Zīmeļīrejis, Krīvejis, Gvatemalys, Pakistanys, Kambodžys i Nigerejis) liktinim, kuruos vīnoj drūsme maineit sovu dzeivi i uzadreikstiešona puorvarēt sabīdreibys nūsaceitūs stereotipus. Izceinejušys sovys personiskuos ceinis, itūšaļt vysys lugys varūnis ir aktivys sabīdryskys darbineicys. Tei ir satrīcūša manifestaceja demokratejis i cylvāktīseibu vuordā.

Sevkurs nu stuostu ir dzili personisks, tī runoj i par dzeivis saškālumu, puordzeivuotū vardarbeibu, i drūsmi dzeivuot tuoļuok.

Rēzeknē, Latgolys viestnīceibā GORS, lugys lasejumā pīsadaleis tieļneica Svetlana Skačkova-Marčenko, žurnaliste Aleksandra Elksne, Rēzeknis pošvaļdeibys kulturys i turisma agenturys direktoris vītneica Maija Brēķe, Rēzeknis Augstškolys profesore Ilga Šuplinska, dzejneica Anna Rancāne, kai ari Zvīdrejis viestnīks Latvejā Henrihs Langerholms i LR Saeimys generalsekretare Kārina Pētersone. Izruodis režisore byus Sintija Ludbuorža.

Dokumentaluo izruode “Septiņi” nūtiks 7. decembrī 18.00 Rēzeknē, Latgolys viestnīceibys GORS mozajā zalā. Īīšona bez moksys. Izruode nūtiks latvīšu, krīvu, angļu i latgalīšu volūduos.

Luga ar panuokumim ir izruodeita daudzuos pasauļa vaļstīs – Balkanūs, Zvīdrejā, Eiropys Parlamentā Briselē i Ņujorkā, kur izruodi ar īvodvuordim atkluoja Hilareja Klintone, sovukuort Oskara bolvys laureate Merila Strīpa izruodē atveiduoja Inesi Makkormaku, Ziemeļīrejis cylvāktīseibu i sīvīšu tīseibu aizstuovi.