Izsludynuota dasasaceišona XI Daugovpiļs storptautyskajam folklorys festivalam
Da 15. janvara īspiejams dasasaceit daleibai XI Daugovpiļs Storptautyskajā folklorys festivalā.
XI Daugovpiļs Storptautyskais folklorys festivals nūtiks 2016. goda 22. – 24. aprelī. Festivala mierkis ir popularizēt tradicionalū latvīšu i cyttautu kulturu, atteisteit, pylnveiduot i kūpt folklorys kūpu, etnografiskū ansambļu tradicejis, taidā veidā nūdrūsynojūt kolektivu darbeibys napuortraukteibu.
Folklorys festivalā aicynuotys pīsadaleit Latvejis nūvodu i uorzemu folklorys kūpys, kuruos kūp i popularizej sovys lokaluos tradicejis.
Festivala laikā nūtiks i vairuoki koncerti, i sasadoncuošonys, i ari meistarklasis, kurymuos dalinīki i festivala gosti varēs vuiceitīs vysaidys prasmis, kuruos sovā kasdīnā izmontuoja myusu seņči.
Festivalu organizej Daugovpiļs piļsātys dūmis Kulturys puorvaļde sadarbeibā ar Latvīšu kulturys centru i folklorys kūpu “Svātra”.
