Leidzeigi kai Alise sovu ceļuojumu izsuoce pa truša olu, tai Rēzeknis Augstškolys (RA) komanda ir suokuse Luisa Kerola gruomotys “Alise Breinumu zemē” prezentacejis pa Latgolys nūvoda školom. Kas ir eipašs itamā gruomotā? Ruodīs, ka gondreiž sevkurs bārns Alisi atguodoj nu sovys bierneibys, tik reši kurs ir itū gruomotu patīsai ari puorskaitejs. Deļkam tai? Partū ka gruomota ir vaira dūmuota leluokim bārnim, jimā ir cīši daudz apraksteits dūmuojamu lītu. I, kab ituos dūmuojamuos lītys byutu vīgļuok saprūtamys, gruomotys nūdaļu beiguos ir kaitys – spēlis, kuruos spielejamys ar draugim, vacuokim ci školuotojim, nu – ar tim cylvākim, ar kurim kūpā ir skaiteita gruomota.

Partū arī RA komanda itū gruomotu īsuoc skaiteit kūpā ar školānim. 13. septembrī RA beja gruomotys attaiseišonys svātki. Skaitūt lūmuos nūdaļu no gruomotys, Ilga Šuplinska (gruomotys redaktore)– teiciejs i Susurs, Evika Muizniece (tulkuotuoja)– Alise, Valentins Lukaševičs (volūdys konsultants)– Capurnīks i Sandra Ūdre (korektore) – Marta Začs, paruodeja Alisis pīdzeivuojumus interesentim.

Sovukuort 19. novembrī mes bejom gostūs Ruguoju nūvoda Eglainis pamatškolā i Ruguoju vydsškolā. Dīna beja sasamuokuse i pa drupetei smydzynuoja, piecsvātku laiks, kod ir drupeit īsastuojs atsluobums. Īeimūt Eglainis pamatškolā, dzydrs – labrīt – myus sagaideja nu vysu pušu, bārni beja prīceigi, ka ir īsaroduši gosti. Tys nūzeimuoja, ka vīna stuņde dažom klasem nanūtiks, partū ka jī pīsadalēs Alisis prezentacejā. A tū, ka školys bārnam nanūteikūša stuņde ir kai mada maize, mes vysi pīmiņom nu sova školys laika.

Tai kai Alisis veiduotuoju komanda nabeja pylnā sastuovā, Capurnīka lūmu prezentacejā daškeira atveiduot maņ, i maņ vajadzēja mudrai saprast, kas niut byus doroms. Piec nalelys apjukuma šaļts, es skaiteju Capurnīka tekstu nu sadalis “Trokuo čaja dzeršona” i piļneibā pagaisu Alisis gruomotā. Laiks paskrēja dreizai, i varēja suoktīs spēļu daļa. Ilga Šuplinska bārnus izvaicuoja par laiku i laika nūzeimeibu kotra dzeivē – voi laiku var nūsist; kai tū dora? I, voi vysod tys, kas nu molys izaver kai laika nūsisšona, patīsai taids ari ir? Vēl dažys spēlis i leidzeigā pasuokumā jau sasatykom ar Ruguoju vydsškolys školānim.

27. novembrī es varieju Alisis prezentaceju pasavērt otkon, itūreiz Andrejdīnys pasuokumā. Naz parkū itūreiz tei skaitejuma daļa man ruodejuos garuoka? I beigu dagaideit nabeja tik vīglai? Te ir ari atbiļe iz tū, kai skaiteit itū gruomotu – nūteikti kūpā ar kaidu i lūmuos, partū ka taidā veidā nagaist viereiba i trenejās ari skaiteitprasme. Sovukuort spēļu daļa beja interesantuoka, partū ka kaituos tyka īsaisteiti ari školuotuoji i pīaugušī, kurī beja atbraukuši leidza bārnim iz pasuokuma “Muna sāta, škola, pogosts/piļsāta 1917.–2015. godi” nūslāgumu.

Ka gribi, kab ari tovā školā voi pogostā īsarūn Alise, sasazynoj ar RA pa teleponu 26656553 ci e-postu: san@ru.lv. I par laika nūsisšonu vysmoz vīnys vuiceibu stuņdis garumā variesi aizmierst!

Roksta autore: Meldra Gailāne, akademiskuos bakalaura programys “Filologeja” 1. kursa studente

Karteņa nu Rēzeknis Augstškolys arhiva