Rēzeknis piļsātys pošvaļdeibys agentura “Rēzeknes Kultūras un Tūrisma centrs” izsludynoj kasgadejū Mozūs kulturys i turisma projektu finansiešonys konkursu, informej agenturys puorstuove Maija Upeniece. Projektus konkursam var īsnīgt da 2016. goda 1. februara.

2016. goda projektu konkursa prioritate – aktivys atpyutys vareibu palelynuošona Rēzeknis piļsātā. Vālams īsnīgt na vīnreizeja pasuokuma projektus, nu īzeimēt projekta perspektivu nuokūtnē, aktivitatis pīmārojūt i saimem, i školānu grupom, kab tuos varātu atkuortuot.

Projektu konkursa dasacejumu īsnīgšonys termeņš: da 2016. goda 1. februara. Projektu realiziešona laikā nu 2016. goda 1. marta da 10. decembra.

Projektu konkursa mierkis i aizdavumi: finansiali atbaļsteit kulturys i turisma daudzveideigu i kvalitativu pīduovuojumu Rēzeknis piļsātā i veicynuot sabīdreibys leidzdaleibu Rēzeknis piļsātys kulturys i turisma atteisteibā. Projektu konkursā var pīsadaleit i juridiskys personys, i pylngadeigys i reiceibspiejeigys fiziskys personys. Izviertejūt īsnīgtūs projektus, komiseja par atbiļsteibu prioritatei daškir papyldu punktus.

Finansiejums tiks daškierts da 50% nu īsnīgtuo projekta summys, kūpejais budžets projektu atbolstam ir 7200 eiro, vaira informacejis var atrast nūlykumā. Projektu dasacejumi juoīsnādz personeigi voi juonūsyuta pa postu, adress: Pošvaļdeibys agenturai “Rēzeknes Kultūras un Tūrisma centrs”, Piļs īlā 4, Rēzeknē, LV-4601 (349. kab.).

Konkursa nūlykums i dasacejuma anketa

Karteņā: 2015. godā atbaļsteitais Mozais kulturys i turisma projekts “Dzeja bārnu prīcai – gruomota “Otkon giunu sapynus””, kū realizēja Latgolys entuziastu grupa “Biļdis”. Inetys Atpilis-Juganis dzejis gruomotys prezentaceja Rēzeknis piļsātys svātkūs, 02.08.2015. Annys Kuzminys foto.