Vakar tyka nūsauktys 15 dzīsmis, kas tykušys Latvejis Radejis 2 reikuotuos dzīšmu aptaujis Muzykaluo banka finalā, pretendejūt iz goda vierteiguokuos dzīsmis latvīšu volūdā titulu. Jūs vydā ir ari grupys “Dabasu Durovys” izpiļdeituo “Šūpuļdziesma”. Da 15. janvara var turpynuot atbaļsteit grupu ar sovu bolsuojumu škārsteiklā.

Bolsuot par goda vierteiguokū dzīsmi var aptaujis sātyslopā muzikalabanka.lv, portalūs draugiem.lv i nra.lv. Bolsuot īspiejams reizi dīnā par vīnu dzīsmi.

Muzykaluos bankys 2015 apbolvuošonys ceremoneja nūtiks 23. janvarī Olimpiskajā centrā “Ventspils”.

Finala bolsuojumam suokumā tyka atlaseitys 25 dzīsmis, kas goda laikā mieneša bolsuojumūs beja sajāmušys vysleluokū klauseituoju atbolstu.

Finala bolsuojumā tykušys itaidys dzīsmis:
Triānas parks – Laika dziesmiņa
Tumsa – Pat nejautā
Musiqq – Silta sirds
The Sound Poets – Viss var mainīties
Mārtiņš Ruskis – Tu esi ceļš
Dabasu Durovys – Šūpuļdziesma
Jānis Stībelis – Ir tik karsts
Astro’n’out – Turies
Lauris Reiniks – Rīts pieneņpūkās
Aija Andrejeva un Goran Gora – Pavasaris
Jauno Jāņu orķestris – Mazais vilciņš
Dons – Dieviņš
Sabīne Berezina – Mājās
Prāta Vētra – Ziemu apēst
Ivo Fomins – Nekas jau nebeidzas

Tradicionali vierteiguokū dzīsmi nūsaceis klauseituoji i Muzykaluos bankys ekspertu padūme, kas veiduota nu profesionaļu, ar aptaujis finaldzīsmem nasaisteitu muziku, kurī ar sovu daleibu kuplynuos ari apbolvuošonys ceremonejis šovu. Ekspertu padūmē itūgod dorbojās latvīšu izceļsmis Holivudys komponiste i “Emmy” bolvys sajiemieja Lolita Ritmanis, komponists, pianists, aranžātuojs i producents Juoņs Strazds, etnomuzikologs i komponists Valdis Muktupāvels, operdzīduotuoja Inga Šļubovska, pianists Raimonds Petrauskis, dzīduotuoja i vokaluo pedagoge Ance Krauze, dzīduotuojs, vokalais pedagogs i komponists Adrians Kukuvass, džeza dzīduotuojs Daumants Kalniņš, televizejis režisors Arvīds Babris i ilggadiejs “Mikrofona” aptaujis veiduotuojs Gunārs Jākobsons.

Atguodynojam, ka paguojušajā godā “Dabasu Durovu” dzīsme “Sejas grāmata” Muzykaluos bankys finalā klauseituoju i žūrejis kūpviertiejumā sajēme 9. vītu.