Jau vairuokus godus „Latgalīšu Kulturys Gazeta” aba portals lakuga.lv kasdīnys viestej par latgaliskom nūtikšonom. LaKuGā pīejama informaceja par Latgolys regiona i cytur Latvejā i pasaulī dzeivojūšūs latgalīšu profesionalū kulturu, pošdarbnīku aktivitatem muzykā, literaturā, teatrī i cytuos mokslys formuos.

Vārts atzeimuot, ka LaKuGa ir vīneigais portals, kura saturs teik veiduots tikai latgalīšu volūdā. Portala asameiba ir aplīcynuojums tam, ka latgalīšu volūdai ir vīta na tikai kasdīnys saziņā saimē ci ar draugim, bet ari globalajā teimeklī – latgaliskais var byut laikmeteigs. Ar kotru godu sabīdreibā aug interese par latgalīšu volūdu, izmontojūt tū latgalīšu kulturys jaunradis procesā, rodūt jaunys dzīsmis, stuostus i dzeju, kinys i teatra izruodis, kai ari eistynojūt cytys rodūšys aktivitatis.

LaKuGys saturs veiduots desmit sadaļuos – muzyka, literatura, redzīni, volūda, cylvāki, viesture i religeja, folklora, muoksla i omoti, teatris i kina i cytys viests. Ari itymā godā portalā varēs skaiteit plašus rokstus par Latgolys viesturē i kulturā nūzeimeigim nūtykumim i izcylom personeibom. Taipat pīduovuosim aktualys intervejis ar latgalīšim, kas aktivi dorbojās Latgolys kulturys saglobuošonā, atteisteibā i populariziešonā.

Aicynojam ikvīnu interesantu pīsadaleit LaKuGys satura veiduošonā, syutūt informaceju par sovys pusis latgaliskajom nūtikšonom ci izsokūt redzīni par itūšaļt aktualim vaicuojumim. Publiciešonai paradzātuo informaceja syutoma iz epostu info@lakuga.lv.

Portala uzturiešonu nūdrūšynoj bīdreiba „Latgolys Studentu centrs”. Portala darbeibu 2016. goda pyrmajā pusē atbaļsteis Vaļsts kulturkapitala fonds.

Portala saturam var leidza sekuot socialajūs teiklūs facebook.com, draugiem.lv i twitter.com.

Viesti sagataveja:
projekta „Latgaliešu kultūras ziņu portāls lakuga.lv” vadeituoja
Vineta Vilcāne