Vydzemis Turisma asociaceja pīškeiruse 34. numeri pyrmajam regionalajam velomaršrutam Latgolys teritorejā, kas tyka izveiduots Kuorsovys, Baļtinovys, Ruguoju, Bolvu i Viļakys turisma specialistu sadarbeibys rezultatā. Velomaršruta pylns garums ir 169 km, i tuo atkluošonys pasuokums teik planavuots 21. majā, informej Kuorsovys nūvoda turisma organizatore Inga Bernāne.

169 km garais velomaršruts vad pa Zīmeļlatgolys regionu i ceļuotuojus puorsteidz ar sovu gasteibu, sirsneibu i nabeidzami skaistū Latgolys dobu. Kotrai vītai Latgolā ir sova viesture i eipaša aura – voi tei byutu bazneica, muiža voi vīnsāta. Pūsmā nu Viļakys da Kuorsovys maršruts vad tyvu Latvejis – Krīvejis rūbežam, kas reizē ir ari Eiropys Savīneibys uorejais austrumu rūbežs. Itymā braucīņa pūsmā velobrauciejim leidza ir juobyut personu aplīcynūšim dokumentim. Velomaršruta “Rypoj vasals!” kartē ir apkūpuotys Zīmeļlatgolys apsavieršonys vītys, kai ari apsamesšonys, atpyutys vītys, velonūmys punkti i veloservisi, kab atvīgluotu puorsavītuošonu i planavuošonu ceļuotgrybātuojim.

Paguojušajā godā Kuorsovys, Baļtinovys, Ruguoju, Bolvu i Viļakys pošvaļdeibys nūslēdze sadarbeibys leigumu par kūpeju i mierktīceigu darbeibu, kab veicynuotu turisma atteisteibu Zīmeļlatgolā. Lauku turisma i veloturisma atteisteiba Zīmeļlatgolys teritorejuos tyka izvierzeits kai prioritars aizdavums turisma izaugsmei i ilgtspiejai. Zīmeļlatgolys turisma specialisti sadarbeibā ar SIA “Sports S” vadeituoju Santu Paegli izstruoduoja Latvejā pyrmū riņdžveida maršrutu īzeimātu obejūs vierzīņūs, kas īt car vysim pīcim nūvodim. Īzeimiešona dobā teik planavuota pavasara suokuos, kab iz turisma sezonys suokumu Zīmeļlatgola var uzjimt pyrmūs veloturistus. Paraleli teik turpynuots dorbs pi vītejuos nūzeimis maršrutu izstruodis, kab ceļuotuoji varātu īpazeit lobuok ari kotru Zīmeļlatgolys nūvodu atseviški.

Eipaši taiseitu veloceleņu tikpat kai nav, partū ritiņbrauciejs kai satiksmis dalinīks brauc pa lelcelim. Velomaršruts puorsvorā vad pa asfaltātim celim, nu ir juosadzeivoj ari ar puteklim iz žvyra saguma. Braucūt pa maršrutu, īspiejams izbaudeit skaistūs lauku skotus, kur dabasi saplyust kūpā ar labeibys dryvom, izbaudeit mežu snāgto pakriesli korstajuos vosorys dīnuos, kai ari vītejūs tradiceju kluotynasameibu. Optimaluo maršruta velosezona ilgst nu maja da septembra.

Zīmeļlatgolys velomaršruts “Rypoj vasals!” tiks prezentāts 5. februarī storptautyskajā turisma izstuodē “Balttour 2016”, kas kotru godu nūteik Reigā, Kīpsolys storptautyskajā izstuožu centrā.

Sovukuort velokartis elektroniskā formatā tyvuokajā laikā byus vareiba dabuot Zīmeļlatgolys turisma sātyslopuos.