5. martā 18.00 nūtiks pyrmizruode ironiskai dejis izruodei “Parunāsim?”, kuruos horeografe i idejis autore ir Irina Saveļjeva, informej teatra puorstuove Janina Ivanova. Pyrmūreiz Daugovpiļs teatra viesturē dejis izruode nūtiks eksperimentalajā zalā, kas dūd pavysam jaunys izpausmis vareibys.

Itymā īstudiejumā horeografe ar doncuotuoju trupys paleidzeibu atspīgeļuos vīnu nu myusu dīnu aktualuokajom problemom – cylvāku sovstarpeigū saskarsmi. Pareizuok byutu saceit – tuos tryukumu. Kab atkluotu skateituojim varūņu īškejūs vaicuojumus, rodūšuo komanda izmontuos vysys īspiejamuos apleicamuos telpys detalis – na tik greidu, nu ari sīnys, grīstus, darbeiba nūtiks pat skapī! Kai stuosta izruodis autore, “Parunāsim?” nav vīnkuorša dejis izruode, partū ka tamā īsaisteiti na tik horeografiskī pa, nu ari akrobatiskī parkour elementi i aktīrmuoksla. Pyrmajā planā byus ideja, i tik tod tai sekuos deja. Sovukuort vysi dūmuotim nūpītnī vaicuojumi, kurūs izraisa izruodis tema, tiks izstuosteiti ar humora i pošironejis paleidzeibu.

Izruodis horeografe i idejis autore ir Irina Saveļjeva, scenogrāfs i kostimu muokslinīks – Egils Viļumovs, gaismu muokslinīks – Sergejs Vasiļjevs.

Doncuotuoji i akteri: Mihails Abramovs, Miroslavs Blakunovs, Māris Boka, Anna Gimbute, Anna Sultanova, Jelizaveta Petrova, Raimonds Paegle, Svetlana Morozova, Arturs Jackevičs.

Karteņa: Džeina Saulīte