Nacionaluo elektroniskūs plošsazinis leidzekļu padūme (NEPLP) 11. februara sēdē apstyprynuoja uzvarātuoju konkursā par TV raidejumu veiduošonu latvīšu volūdā 2016. godā Latgolys regionalajūs i vītejūs elektroniskajūs plošsazinis leidzekļūs. Par konkursa uzvarātuoju NEPLP pīzyna naatkareiguos producentu grupys SIA “Studija 3KM” pīduovuojumu.

“Studija 3KM” konkursā pīduovoj veiduot 15 izgleitojūšus raidejumus cyklā “Sajūti Latgali” (kotru – 27 minutu garumā), kas da goda beigu byus radzami televizejā Re:TV i škārsteiklā. Raidejumūs dūmuots atspīgeļuot itaidys temys: latgalīšu volūda, sabīdriski aktualuos nūtikšonys Latgolā, uzjiemieju veiksmis stuosti, Latgolys tradicejis, naparostī latgalīši i cytys. Raidejumu cykla nūdūms ir veicynuot sabīdreibys salīdiešonu i styprynuot vaļsts volūdys pozicejis, kai ari īspiejami plotai informēt par Latgolu i latgalīšim.

Konkursa finansiejums ir 35 571 eiro. Sabīdryskais pasyutejums paradzāts regionalajim i vītejim elektroniskajim plošsazinis leidzeklim i producentu grupom Latgolys regionā. Finansiejuma mierkis ir sabīdreibys salīdiešonys, nacionaluos ideņtitatis i vaļsts volūdys pozicejis nūstyprynuošonys pasuokumu eistynuošona, kab panuoktu Latvejis ideņtitatis i pīdareibys izjiutys styprynuošonu car regionaluos i vītejuos ideņtitatis apsazynuošonu i veicynuošonu, itymā procesā īsaistūt Latgolys regiona puorstuovus, kai medeju satura veiduotuojus i izplateituojus.

Izsludynojūt četrus konkursus par radejis i TV programu veiduošonu Latgolā, NEPLP ituogods suokuos izsuoce īvīst Latgolys elektroniskūs medeju programu, kuruos nūdūms ir styprynuot Latgolys informativū sasaisti ar puorejim Latvejis apgobolim i garaņtēt, ka Latvejis pīrūbeža dzeivuotuoji teik informāti par vaļstī nūteikūšajim procesim i storptautyskū nūtikšonu atteisteibu.