Majā nūtiks Daugovpiļs teatra dīnys Reigā
Nu 2013. goda pavasara Daugovpiļs teatris ir suocs tradiceju – Daugovpiļs teatra dīnys Reigā. Da šam Daugovpiļs teatris Reigys skateituojim paruodejs jau 12 izruodis. Itūgod Daugovpiļs teatra dīnys Reigā nūtiks nu 9. da 23. maja, kuruos Latvejis Nacionalajā teatrī i M. Čehova Reigys Krīvu teatrī byus vareiba nūsavērt vysaidu žanru izruodis latvīšu, krīvu i latgalīšu volūduos.
Daugovpiļs teatra dīnys Reigā 9. majā 19.00 Latvejis Nacionalajā teatrī īvadeis vīns nu spylgtuokajim Daugovpiļs teatra ituos sezonys īstudiejumim – Imris Kalmana operete krīvu volūdā “Mistera Ikss noslēpums” (rež. O. Šapošnikovs). 15. majā Latvejis Nacionalajā teatrī 12.00 nūtiks kruošņs muzykls bārnim latvīšu volūdā “Leo – mazais lauva”, kurs tyka nomināts “Spēlmaņu nakts” bolvai vairuokuos kategorejuos. Sovukuort 19.00 – eistyns latgalīšu gors šokejūšā komedejā “Latgaliešu rulete” (rež. O. Šapošnikovs).
Daugovpiļs teatra dīnys Reigā tiks nūslāgtys 23. majā 19.00 M. Čehova Reigys Krīvu teatrī, kad skateituoju viereibai tiks pīduovuota spylgta dejis izruode par mīlesteibu “Kazanova. Henrieta. Venēcija.” (horeogr. I. Saveļjeva).
Karteņa nu izruodis “Mistera Ikss noslēpums” (autore: Džeina Saulīte)
