Apreļa ūtrajā pusē vysi interesenti aicynuoti apmeklēt tradicionaluos Latgolys pūdnīku dīnys, kas suoksīs ar attaiseitūs durovu dīnu Rēzeknis Muokslys i dizaina vydsškolā 14. aprelī.

20. aprelī nūtikšonys paradzātys Rēzeknis nūvoda Nautrānu pogosta Rogovkā, kur tiks atkluota Jura Soikāna Ludzys muokslys školys Nautrānu filialis keramikys dorbu izstuodis atkluošona (školotuojs Pīters Gailums), kai ari nūtiks Latgolys nūvodu bārnu interešu izgleiteibys vizualuos muokslys i keramikys puļceņu rodūšais konkurss “Saldumu trauks”.

28. aprelī paradzātys attaiseitūs durovu dīnys Latgolys pūdnīku darbneicuos: Daugovpiļs Muola muokslys centrā, Pītera Gailuma atjaunuotajā keramikys darbneicā Jaungailumūs, Olgys i Valda Pauliņu keramikys darbneicā Kruoslovā, kai ari Olgys, Voldemāra, Juoņa i Māra Vogulu keramikys darbneicā “Voguly” Cepleišūs.

Sovukuort 29. aprelī dīnys pyrmuo puse tiks aizvadeita Latgolys Kulturviesturis muzejā, kurymā nūtiks teoretiskī lasejumi par aktualom nūtikšonom lītiškajā muokslā Latgolā. Pīsadaleis Daina Kraukle nu Latvejis Etnografiskuo Breivdobys muzeja, Janina Kursīte, Elīna Kursīte i Rūta Jirgensone nu Latvejis Universitatis, Valentins Petjko nu Rotko muokslys centra i Evija Vasilevska nu Latgolys Kulturviesturis muzeja. Paradzāta ari ekskurseja Latgolys keramikys ekspozicejā “Māla un uguns pārvērtību radīts brīnums”, kai ari virtualuo spēle “Māla pārvērtības”.

Nu 29. apreļa vokorā ceplis tiks kūrts Stanislava Viļuma darbneicā “Cukrasāta”. Byus meistaru demonstriejumi, apdadzynuošonys tehnologeju pīlītuojums cepļūs, vareiba izvaicuot pūdnīceibys meistarus i klauseitīs jūs stuostūs, kab puorsalīcynuotu par uzkruotū zynuošonu i pīredzis boguoteibu. Nuokušajā reitā 10.00 nūtiks cepļa izjimšona.

30. aprelī Latgolys pūdnīku dīnys tiks nūslāgtys ar izstuodis atkluošonu Lūznovys muižā.