Daugovpilī nūtiks Muokslys dīnys
5. aprelī 15.00 Latgolys Centralajā bibliotekā (Daugovpilī, Reigys īlā 22a) ar izstuodi “Latgales daba” tiks atkluotys Muokslys dīnys Daugovpilī 2016, informej Daugovpiļs piļsātys dūmis Kulturys puorvaļde.
Kai kotru godu, ari itūgod, aprelī i majā, vysā Latvejā teik svieteitys Muokslys dīnys, kurymuos sovys nūtikšonys pīduovoj ari daugavpilīši, dūdūt vareibu apsavērt i vītejū, i ari uorvaļstu muokslinīku veikumu. Jau nu 5. apreļa byus vareiba apsavērt četrys jaunys izstuodis: Daugovpiļs Universitatē izstuodi “Es esmu…” i fotoizstuodi “Stop! 95. kadrs”, nu Latgolys Centralajā bibliotekā – Sergeja i Stanislava Minakovsku gleznu izstuodi “Latgales daba” i Ingys Vasiļjevys rūkdorbu izstuodi “Filca virpulis”.
Muokslys dīnu Daugovpilī 2016 pasuokumi turpynuosīs da 14. maja. Sevkurs interesents varēs apmeklēt na tik izstuodis, nu ari attaiseitūs durovu dīnys, muokslys akcejis, vysaidys lekcejis i meistarklasis i cytys. aktivitatis, kū pīduovuos Daugovpiļs kulturys i izgleiteibys īstuodis, muokslinīku studejis. Sovu kulminaceju Muokslys dīnys sasnēgs 24. aprelī, kod tiks svieteits Daugovpiļs Marka Rotko Muokslys centra 3 godu jubilejs. Itamā dīnā tiks atkluota na viņ jaunuo izstuožu sezona centrā, nu ari apsavieršonai byus daīmami jauni Marka Rotko dorbu originali. 24. aprelī īīšonys moksa Marka Rotko Muokslys centrā – muokslinīku ūteņa.
Muokslys dīnys Daugovpilī 2016 organizej Daugovpiļs piļsātys dūmis Kulturys puorvaļde sadarbeibā ar Daugovpiļs regiona muokslinīku asociaceju, Daugovpiļs Marka Rotko muokslys centru, Daugovpiļs Nūvodpietnīceibys i muokslys muzeju, Daugovpiļs Muola muokslys centru, Daugovpiļs Dizaina i muokslys vydsškolu “Saules skola”, Daugovpiļs Universitati, Tautys lītiškuos muokslys studeju “Klūga”, Latgolys Centralū bibliotēku, Latviešu kultūras centru un Art Studio „Putra”.
