Vasali!

Sajiemu viestuli nu LR Izgleiteibys i zynuotnis ministrejis par dorba grupys izveidi, kam da 20. decembra juoizstruodoj prīšklykumus i juoīsnīdz izglītības un zinātnes ministra parakstītu informāciju Ministru prezidentam par veicamajiem pasākumiem latgaliešu rakstu valodas kā vēsturiska latviešu valodas paveida saglabāšanai, aizsardzībai un attīstībai.
Tys ir, dorba grupai juosagatavej prīšklykumi par Latvejis vaļstī napīcīšamajim pasuokumim Vaļsts volūdys lykumā ītvartūs normu īvesšonai dzeivē – latgalīšu rokstu volūdys saglobuošonai, aizsardzeibai i, pats golvonais, atteisteibai.

Tai kai maņ zvanēja nu IZM i vaicuoja, lai pīsadolu dorba grupā, partū ka izgleiteibys ministrs R. Broks aizruodiejs, ka pošu latgalīšu tī ass par moz, tod pīkrytu pīsadaleit i puorstuovēt LgSC.
Muna daleiba itymā dorba grupā ir apstyprynuota, saskaņā ar LgSC statutim puorstuovu bīdreibu. Deļtuo maņ cīši svareigai zynuot, kū latgalīši (i na tikai LgSC bīdri) soka itymā sakarā.

Ituos IZM dorba grupys sataiseišona ir sekys tymā skaitā i garajai LgSC sarakstei ar Ministru prezidentu nu 2007. goda 25. janvara. Ite vari puorskaiteit 2007. goda 31. maja viestuli Aigaram Kaļveišam, tuo laika Ministru prezidentam.
Beja ari kluotīnis sasatikšonys IZM kai tikai ar LgSC puorstuovim, tai ari jau plašuokā lūkā, pīsaistūt atbiļdeiguos vaļsts īstuodis i institucejis, augstškolys, ministrejis i cytys navaļstiskuos organizacejis.

Tok golvonais, kū saprotu nu ituos garuos jimšonuos i kū grybātūs pasaceit – mums, pošim latgalīšim, ir juoīt ar konkretim prīkšlykumim, kū mes poši niu asam gotovi dareit i kam mums vajag vaļsts atbolsta.
Partū ka vaļsts nav nazkur. Vaļsts asam mes poši, a vysys ituos institucejis ir myusu deļ, na mes jūs deļ.
Kai stabulē pyussim, tai i skanēs. Ka vaidēsim, kai myusus nivīns nažāloj, nivīns i nažāluos.

Ir taida puosoka par kieneņa dālu, kas aizguoja pasaulī nalaimis maklātu, partū ka jam vyss beja, a gribējēs redzēt eistuos dzeivis. Kod jis mauduojuos upē, jam nūzoga drēbis i vītā pamete uboga kokarus. Apsaviļcs vacajuos drēbēs, jis pīdzeivuoja izsmīkli i cīsšonys. Nivīns naticēja, ka tys kieneņa dāls. Ubogs tok nu skota i sytams, ar kuoju sperams.
Kab tys jaunais puiss byutu ījiems golvā, kū jam cyti soka, tai i vysu myužu atsavolkuotu pa pasauļa lelcelim. Tok sirdī to jis palyka jis pats. Deļtuo ari tyka atpakaļ pilī i tyka par kieneņu.
Tai ka navajag pasadūt seve žāluošonai. Cikom es rokstu latgaliski i Tu tuo skaiti, mes asam. I mes obeji vari dūmuot tuoļuok, kai par sovu volūdu i sovu pīredzi pastuosteit cytim.

Tū stuostu na deļtuo, ka maņ puosokys meilys. Koč i kotrā puosokā ir patīseibys gryudeņš.
IZM Vaļsts volūdys politikys nūdalis vadeituoja Zaiga Sneibe atsyutēja viestuli ar lyugumu īsnīgt prīšklykumus: Lai sanāksme noritētu konstruktīvi, lūdzu līdz trešdienai, 24.novembrim, elektroniski atsūtīt priekšlikumus pasākumiem, kas veicinātu latgaliešu rakstu valodas attīstību.

Deļtuo niu prosu Jiusu paleiga – sagatavēt prīšklykumus latgalīšu rokstu volūdys atteisteibai.
Kaidys ir latgalīšu vajadzeibys, problemys, suopis taišni volūdys kontekstā? Kaidys ir idejis, kas juodora, kab volūda dzeivuotu? Kū mes poši apsajemam dareit i kaids vaļsts atbolsts tam ir vajadzeigs?

Gols golā, myusim ir myusu vaļsts Latveja, kas itamuos dīnuos sviņ sovu pastuoveišonys godadīnu.
Aizbraucūt gostūs da Sibira latgalīšu, kur vacys veceitis tuolejuos dzeraunēs vēļ atguodoj seņču volūdu, a unuki voi praunuki apleik skraida i latgaliski tik zyna i sauc tik vīnu vuordu “Vasali, vasali!”, varim labi puorsalīcynuot, ka vaļsts atbolsts – tys tok taida pošsaprūtama līta, tok tys ir daudz.

Augusts Egluojs
Ostoņpadsmytajā novembrī

Karūgus gaisūs paceļsim augši,
Sorkonboltsorkonuos kruosys lai zīd,
Ikvīns lai slavi breiveibai dzīd
Un acs lai nasadz ar plaukstu.
Dīnā šamā lai slavejam drūsmi,
Breiveibys sluopis, kas cylvākūs meit,
Gūds lai ir tim, pret kolnu kas īt
Un tautā mūdynoj rūsmi.
Lai pīminim strieļnīkus… Zīmsvātku snīgs
Jūs asnim kruosojās sorkons
Un naktīs, tamuos borgajuos naktīs
Jau bluozmuoja breiveibys reits.
Nūjimsim capuris, pīmynūt bruoļus,
Kas naatguoja dzymtajā sātā,
Jūs breiveibys olkys, jūs varūņu slavu
Lai paturim pīmiņā svātā.
Lai dzimtinis gūdam atdūdam vysu
I montu, i slavu, kū cylvāks var giut,
Un gaišuoku dzeivi un laimeigys dīnys
Lai nuokamuos paaudzis jiut.
Karūgus, karūgus paceļsim gaisūs,
Sorkonboltsorkonuos kruosys lai zīd!

Latgaliskuo Latgola ir latvyskuo Latgola.
Sveicīņs svātkūs!

Ar cīnu –
Ilze Sperga,
LgSC vaļdis prīšksādātuoja