Daugovpiļs cītūkšņa Kulturys i informacejis centrā (Nikolaja īlā 5) apsaverama mārtrauku ekspoziceja, informej Daugovpiļs piļsātys pošvaļdeibys turisma atteisteibys i informacejis agentura.

Ekspozicejis leluokū daļu veidoj vysaidu laiku stykla buteleitis. Tuos ir i tintneicys, i smuordu i zuoļu buteleitis. Apsaveramys ari vidieja izmāra butelis, kas puorsvorā ir padūmu laika pīna butelis, kuruos jaunuokuo paaudze vairs naatpazeist. Apsaveramys ari vysaidu cytaidu dzierīņu butelis.

Ekspoziceja izveiduota, atzeimojūt Iudiņa paceļamuo kuorma, kurymā atsarūn Daugovpiļs cītūkšņa Kulturys i informacejis centrys (KIC), 150 godu jubileju. Kuorms tyka calts 1865. – 1866. godā, i tys kolpuoja cītūkšņa iudiņa apguodis sistemys nūdrūsynuošonai. Itam mierkam Daugovys lobajā krostā beja izveiduotys 3 okys, nu kuruom ar tvaika syukņu paleidzeibu iudiņš tyka syuknāts iz lelu, knīdātu metala tvertni ar 3000 spaņu ītiļpeibu. Tvertne ir sasaglobuojuse da myusu dīnu, i sevkuram KIC apmaklātuojam ir vareiba tū bez moksys apsavērt. Jaunuos ekspozicejis ideja ir ar dažaidu viesturiskūs trauku paleidzeibu paruodeit apmaklātuojim, cik daudz itaidu trauku beja vajadzeigs, kab pīpiļdeitu lelū knīdātū iudiņa tvertni. Tai kai tvertnis ītiļpeigums teik miereits spaņūs, tod ekspozicejā īkļauti ari dažaidi spaņi, nu kurūs leluokuo daļa tiks izvītuota tvertnē, kab apmaklātuoji poši varātu puorsalīcynuot par tvertnis ītiļpeigumu.

Itamā laikā palīk ari 5 godi, kai itys kuorms tyka renovāts i tuo telpuos dorbu suoce KIC. Itūšaļt KIC ir vīta, kur  apmaklātuoji var izzynuot par cītūkšņa viesturi, apsavērt nalelu viesturis ekspoziceju, pasyuteit ekskursejis, kai ari sajimt cītūkšņa kartis i bukletus.