Daugovpiļs nūvoda Leiksnā nu 1. da 3. juļa jau sastū reizi nūtiks leluokais jaunuos latgalīšu muzykys festivals “Muzykys Skrytuļs‟, salosūt kūpā muzikus, kurī vysaidūs žanrūs roda dzīsmis latgaliski, informej Leiksnys pogosta Kulturys noma vadeituoja Sanita Pinupe.

Pīktdiņ, kod gūdā tiks caltys latgalīšu dorba tradicejis,  jau nu 19.00 nūtiks Etnomuzykys koncerts, kurymā pīsadaleis Leiksnys pogosta KN VPDK “Daugaveņa”, F/k Dyrbyni, Etnografiskais ansamblis “Vabaļis”, Ivars Štubis (Australeja), LgSC folklorys kūpa “Ceidari”, deju kolektivs i kapela “Dziga”. Koncerta nūslāgumā pyrmū reizi festivala viesturē nūtiks leluo latgalīšu sasadzīduošona kūpā ar folklorys kūpu “Ceidari”. Vokora gaitā kluotynasūšī tiks aicynuoti iz daņčim ar grupu “Rikši”, F/k “Dyrbyni” i kapelu “Dziga”. Sovukuort pušnaktī iz leluos skotuvis muzicēs grupa “Straume”.

Sastdiņ, Latgolys skaistuos dobys dīnā, nūtiks diveji koncerti. Dīnys koncertā jau nu 16.00 uzastuos VIA “Nagaidama prīca”, Ivars Štubis (Australeja), Vokaluo studeja Stage On, Daiņs Adijāns, Grupa “Poezijos medžiotojai” (Lītova), Laura Bicāne, Džeina Gavare ar grupu i Vinsents Kūkuojs.

Nakts koncertā 19.00 iz leluos skotuvis spielēs: Projekts “Jezups i muosys”, Projekts “Brigita&co”, Piparmētra, Unknown Artist, 3. Ņutona lykums, Trikmins, Voiceks Voiska, METRS i Gandreiž 10nīkā.

Kluotyn pi koncertu festivala laikā nūtiks pleners “Muokslys Skrytuļs”, byus apsaverama muokslinīku dorbu izstuode, dorbuosīs omotnīku tierdzeņš i bārnu piļsieteņa, kai ari piec koncertu sevkurs varēs izadoncuot latgalīšu muzykys diskotekā, kū pīduovuos DJ Gatis i DJ Wii.

Svātdiņ festivala nūslāgumā Leiksnys Vyssvātuos Jezus Sirds Rūmys katuoļu bazneicā nūtiks goreiguos muzykys koncerts, kurymā goreiguos dzīsmis izdzīduos Laura Bicāne, Leiksnys pogosta KN sīvīšu vokalais ansamblis “Elēģija”, Jūlija Peceviča, Leiksnys Vyssvātuos Jezus Sirds Rūmys katuoļu bazneicys draudzis bārnu i jaunīšu kors, Leivuona nūvoda Kulturys Centra jauktais kors “Rubus” i Vyšku veiru kors “Mōls”. Itymā koncertā nūtiks pyrmatskaņuojums Leiksnā dzeivojūšūs grafu Plāteru prīškteča Broel – Plater Maria 1874. godā saraksteitajai dzīsmei “Vieni o bella: serenata”, kū izpiļdeis Jūlija Peceviča.

Jaunuos muzykys festivala “Muzykys Skrytuļs‟ reikuošona tyka aizsuokta 2005. godā ar mierki popularizēt latgaliskū ideņtitati i sekmēt jaunu dzīšmu radeišonu latgaliski. Festivala moto ir “Kruot var na tikai naudu”, partū festivals vysim apmaklātuojim ir bez moksys.