Ar jaunu sezonu LTV atsagrīž raidejums “Cytaidi latviskais”
3. julī 18.20 Latvejis Televizejis 1. kanalā ar jau 4. sezonu atsagrīž raidejums “Cytaidi latviskais”.
Jau catūrtū godu latgalīšu dzejnīks, nūvoda pietnīks Valentins Lukaševičs sešys svātdīnis aicynuos īpazeit latgaliskū vidi, aizrauteigus cylvākus, nūviertēt interesantys nūdarbis i īsaklauseit latgalīšu volūdā.
Pyrmais stuosts tiks suokts vītā, kū napuorspeilejūt var saukt ari par nacionaluos atmūdys pārnejuo godu symta ostoņdasmytajūs godūs suokūtni – Daugovys lejteci pi Slutiškim. Taišni Daugovpiļs HES īspiejamuo celtnīceiba salīdieja tautu, lyka īsaklauseit Dainī Īvānā i nūviertēt myusu nacionaluos vierteibys. Vītejī, ari plūsta kapteiņs Ilmārs Lociks, itū vītu sauc par Daugovys vuortim, kur sevkurs var izbaudeit breineigū dobys parku “Daugavas loki”. Valentins Lukaševičs kūpā ar plūstnīku Ilmāru Lociku i fotografu Aleksandru Bondarenko pa Daugovu ar plūstu nūbrauks 18 km nu Slutišku da Vasargilišku, ceļuojuma laikā jim dasavīnuos dzīšmu autors i izpiļdeituojs Jurs Ostrovskis, byus zyvu givieju stuosti, vareiba izkuopt Slutišku krostā i baudeit vīnmiereigū upis plyudumu.
Karteņa: ltv.lv
