Reigys svātku ītvorūs 13. augustā vysys dīnys garumā Jākuba laukumā tiks svieteita Latgolys dīna Reigā, viestej Reigys svātku sātyslopa.

Latgolys dīnā Reigā jau tradicionali vysus gaida Latgolys tematiskūs cīmu programa, kuruos ītvorūs reidzinīki i piļsātys gosti varēs īsapazeit ar ceļojūšū tiergu, vērtīs omotnīku dorbuošonūs, prīcuotīs latgalīšu tautys muzykys i deju pavadeibā.

Latgolys tiergā Reigys svātku apmaklātuoji varēs īsaguoduot lobumus nu Latgolys cīmu – smuordeigu, iz kļovu lopu captu malnū maizi, lauku sīvu sītu sātys sīru, kapceitu gaļu, sātys dasys i špeki, avīšu i upiņu sātys veinu, eistu lauku mīsteņu, marmeladus nu ūgu sulu, mada i voska izstruoduojumus, zuoļu čajus, tradicionalū Latgolys keramiku, pynumus, izšyvumus, zupu no leluo saimis kotla i kluotyn tam vysam baudeit vīsmīleigu i omuleigu jutūni – kai Latgolā!

Jākuba laukumā varēs redzēt i pūdnīku dorbuošonūs ar muolu, audieju ausšonu stuovūs, i kaļva kaļšonu. Tierga atraktivitati ik pa laikam spylgtynuos latgalīšu volūdys, tautys deju i muzykys kluotbyutne. Īsavieršona kinys temā, kas saistuos ar Latgolys nūvodu, paleidzēs izprast nūvoda burveibu. Reigys svātku apmaklātuoji varēs īsapazeit ari ar turisma vareibom Latgolā.

Gunārs Igaunis iepazeistynuos ar kūklis taiseišonu, kūklis spēlis muokslu, varēs paraudzeit veiksmi dreizajūs latgalīšu volūdys kursūs i nūpeļneit kaidu bolvu. Nu 10 da 12 stuņžu vysi Latgolys dīnys gosti varēs īsapazeit ar ceļojūšuo tierga dalinīkim i Latgolys tematiskajim cīmim: Vyšku omotnīku cīmu, Nuokūtnis ūzulu cīmu, Skaistuos Izabellys cīmu, Kotleru veina cīmu, Tierga cīmu, Muzykantu cīmu, Gūda saimineicu cīmu, Turku pierts cīmu, Raibuos pyura skreinis cīmu, Zylupis kinu cīmu, Leiksnys muižys parka cīmu, zyrgu cīmu.

Skateituojus prīcynuos kapela “Augusti” nu Leivuona nūvoda. Ar latgalīšu kinu muzyku īpazeistynuos grupa “Miggla” no Aglyunys nūvoda. Deju kūpa “Vanagi” nu Vuorkovys nūvoda i jaunīši nu Leivuona deju kolektiva “Silava” īvadeis apmaklātuojus tautys dejis sūlī.

Pasuokuma nūslāguma daļā nu 18 da 19 paradzāta jau tradicionaluo sasadzīduošona ar muzykantim.

Paraleli ituom nūtikšonom 16.30 Vērmanis duorzā pasuokuma “Kino ceļojums” ītvorūs spielēs grupa “Laimas Muzykanti”. Koncertā varēs ari izzynuot, kaids īvāruojams davums Latvejis kinys viesturē ir ari Latgolys regionam.

Vysa golā 20.00 kopejneicā “Leningrad” nūtiks kūpeiga balleite (after-party) ar Artūra Uškāna i juo draugu pīsadaleišonu. Muziciešona, kūpeiga sasadzīduošona, daudz latgalīšu volūdys i latgaliskys sirsneibys. Paradzāti ari konkursi ar bolvom nu Latgolys, kai ari varēs nūbaudeit Latgolā taiseitu olu (craft beer).