25. septembrī 16.00 Daugovpiļs Marka Rotko muokslys centrā nūtiks jaunuos rudiņa izstuožu sezonys atkluošona ar devizi “Veltījums Rotko” – atzeimojūt muokslinīka Marka Rotko 113. dzimšonys dīnu, informej centra puorstuovi.

Jaunū rudiņa izstuožu sezonu caurvyn laika i telpys fenomena pietejumi, kas īsabolsoj Jekaterinys Ježkovys portretejumūs i Martinys Lafonys Rotko daiļradis pietejumūs i simboliskūs kompoziceju stuostūs. Par Daugovpili kai Rotko piļsātu ari itamā reizē sovūs dorbūs runoj 12. storptautyskuo gleznīceibys simpozeja “Mark Rothko 2016” dalineicys, kuruos caur sīvītis prizmu savyn skotu i tuo realizaceju materialā, veicynojūt Rotko vuorda ilgtspieju i sovpateigu otkonsasatikšonu ar izcylū muokslinīku laika nūgrīznī.

Solomona Geršova retrospektivuo 110 godu jubileja izstuode paspylgtynoj laiku i nūtikšonys, plotai īzeimejūt Geršovam rakstureigū tematiku i tuo laika nūskaņu šudiņdīnys skateituojam. Ari treis muokslinīku Anatoleja Zelča, Vjačeslava Fomina, Anatoleja Šandurova projekts “Paralēles” runoj par telpys kūpumu, kas vīnoj i škir, i reizē veidoj fiziskys i filozofiski giunamys paralelis muokslā i tuos saprasšonā.

Tik dažaidi muokslinīki, nu ar vīnu mierki – likt skateituojim dūmuot, i cik cīši tys pīstuov itam rudineigi apcereigajam godalaikam.

25. septembrī Daugovpiļs Marka Rotko muokslys centrys jau atkuortuoti aicynoj vysus īsasaisteit eipašā Boltuos lopys akcejā, kuruos ītvorūs kotrys, kas atness leidza jaunu zeimiešonys albumu i duovuos tū Rotko centram, varēs apmeklēt vysys muokslys centra ekspozicejis bez moksys. Akceja dorbuosīs vysu dīnu nu 11.00 da 19.00, sovukuort puorejim apmaklātuojim īīšona par akcejis cenom: maineiguos izstuodis (Sektori B,C,D kūpā) par 1.50 eiro, nu pastuoveiguo ekspoziceja “Marks Rotko. Dzīve un māksla” (Sektors A) par 3 eiro.

Jaunūs izstuožu sezonu skateituoji varēs baudeit da 6. novembra.