25. septembrī nu 9.00 da 15.00 Rēzeknis Kulturys i atpyutys parkā (Raiņa īlā 29a) nūtiks kasgadejais Mikeļdīnys godatiergs, informej Rēzeknis pošvaļdeibys agenturys “Rēzeknes Kultūras un tūrisma centrs” puorstuove Maija Upeniece.

Kai īrosts ražys svātkūs, byus i sātys ražuotuoju gataveiti īvuorejumi, sīri, pošcapta maize, peirāgi, svaigs mads, zivs, galis kapcejumi, uobeli i duorzeni. Kab īsapierkšona byutu jautruoka, byus ari ļusteigys dzīsmis par duorzenim i dejis. 10 stuņdēs rudiņa meļdeņus suoks pīduovuot pyušamūs instrumentu orkestris “Rēzekne”, kam sekuos dzīšmu koncerts, kurā pīsadaleis Rēzeknis kolektivi: pūļu kors “Jutrzenka” (vad. Irena Ivanova), ukraiņu ansamblis “Vodograj” (vad. Tatjana Orlova), krīvu folklorys kors “Ivuški” (vad. Jelena Burova), kazaku ansamblis “Debeszils zieds” (vad. Tatjana Rasčosova), folklorys kūpa “Rūta” (vad. Madara Broliša) i ansamblis “Harmonija” (vad. Olga Gaile). 12 stuņdēs tiks suokts deju kolektivu koncerts, kurū vadeis lelais Mikeļs – Ilmārs Dreļs. Koncertā pīsadaleis: bārnu deju kolektivs “Dziguči” (vad. Gunta Sidorova, Rēzekne), jaunīšu deju kūpa “Austra” (vad. Lūceja Kukaine, Viļāni), videjuos paaudzis deju kūpys “Dziga” (vad. Ilmārs Dreļs, Rēzekne), “Vadži” (vad. Inga Peļņa, Rēzekne), “Kūzuls” (vad. Vineta Āboliņa, Rēzeknis nūv. Veremu pog.), “Dancari” (vad. Nataļja Sprukte, Rēzeknis nūv. Gaigalovys pog.), “Ūdzeņa” (vad. Sintija Borise, Rēzeknis nūv. Leņdžu pog.), “Rutuļi” (vad. Ruta Mika, Rēzeknis nūv. Maltys pog.), “Kaunata” (vad. Alla Silova, Rēzeknis nūv. Kaunata), senioru deju kolektivs “Zelta atvasara” (vad. Olga Deksne, Rēzekne). Tierga kulturys programa tiks nūslāgta 13.00 ar dueta Inga i Normunds koncertu “Rudenī”.

Itūgod godatiergā eipaši tiks akcentāts duorzeņu dūbis karaļs – būrkons, kas ir vīns nu vacuokūs sakņaugu, kū cylvāki izmontoj jau 4000 godu. Mikeļdīnys godatierga apmaklātuoji teik aicynuoti sasapucēt ar vysaidim oranžys kruosys aksesuarim, leidzi jemūt ari būrkonu, kū varēs izmontuot Leluos būrkonu skulpturys ceļšonā. “Oranžuokūs” apmaklātuojus gaida puorsteiguma bolvys!