6. oktobrī 18.30 Daugovpiļs nūvoda kulturys centrā nūtiks bīdreibys “Latgolys Studentu centrs” (LgSC) Daugovpiļs biroja i folklorys kūpys “Dyrbyni” reikuotais pasuokums “Rudiņa danču i dzīsmu vokors”, informej LgSC puorstuove Gunta Nagle.

Bīdreiba “Latgolys Studentu centrs” pastuov jau 11 godu. Tei ir jaunīšu organizaceja, kas dorbojās Reigā, Jelgovā, Rēzeknē i Daugovpilī, kur puļcejās jaunīši, kam interesej i ruodīs saistūša latgalīšu volūda, kultura, tradicejis, viesture, kai ari regiona atteisteiba myusu dīnuos.

Sovukuort Daugovpiļs nūvoda Kulturys centrā jau 9 godus dorbojās folklorys kūpa “Dyrbyni”. Folklorys kūpys nūsaukums precizi raksturoj tuos dalinīkus – aktivi, darbeigi cylvāki, kurī nimoz tik vīgli navar nūsēdēt vīnā vītā. Tū pīruoda ari “Dyrbynu” aktivuo daleiba vysaida mārūga pasuokumūs Daugovpiļs pusē, kai ari aiz Latvejis rūbežu.

Laika gaitā izaveiduojuse veiksmeiga sadarbeiba storp “Latgolys Studentu centru” i “Dyrbynim”, partū ka obejuos dorbojās jaunīši ar kūpeigom interesem. Juodasoka, ka daļa “Dyrbynu” dalinīku aktivi īsasaistejuši studentu bīdreibys darbeibā, sovukuort “Latgolys Studentu centrs” atbolsta sovejūs.

Taišni partū itū rudiņa sezonu planavuots atkluot kūpā īskandynojūt folklorys kūpys “Dyrbyni” sātu – Daugovpiļs nūvoda Kulturys centru.

Folklorys kūpa “Dyrbyni” i bīdreiba “Latgolys Studentu centrs” kruosainajā deju i dzīšmu vyrpulī aicynoj dasavīnuot sevkuru interesentu naatkareigi nu vacuma i nacionaluos pīdareibys.