***

es zynu kur ir šaubys
pazaudiejumi atlaižu dīnā
vairuok kai vajag meža ūgu kruosu
i kritīņa nu viersyunis

***

tyvuma vaid
kod suop
ikebana saveituse vakardīnys
aizmiersta reita
šampanīša druskys
iz gluožainuo goldviersma
nameklej mani
daudz klusuma kurā
vari apsamaļdeit

***

vysi lūgi šudiņ da golam
vaļā
atvosoru sviņ
caurvieja riņča daņcs
pasaceļ putekļu kuortys
iznas ustobu byuteibu uorā
sasagrīž iz asfata fotografeja
ar laimeigu smaidu
kurs sekundis laikā
sameits

***

nu tevis nagrybu atsasaceit
lidmašinys dyukūņa
muokūņu vatainums
tuoļuma nūlemteiba
tovi skuovīni
kai iluzeja
nasamaterializej
vaira
atsasaceit nagribu nu tevis

***

mandarinu mizenis
ar tuobreiža
skaņom pylna
īguoda dzarstuos
pa krostim myglu i
svaigu gaisu
vysi apsūlejumi
pabierst zam rīpu
iz granta ceļa
i vokora tymsneibai
nav nūslāpuma

***

elektreibys stoba
beidzameiba
baciana pereklis
uzticeibys oreola
atbluozmis
vīns sagaida otkondīnu
a tovai atmiņu kartei
beidzīs lītuošonys
termeņš

***

puspudele Pypyru ryugtuo
kompresem
vacī makaroni i cyuku pupys
vyss vīnā maisā – prūm
ka tu dūmoj – jei nav dāma
tok apsaver iz smolkim nadzenim
perlamutra kruosā
i mežgiņu atvārumu
storp kryušu

***

stumbrs pi tuo daspīžu
kveļdeigu pīri
pludynojās manī dzeiveibys spāks
dreiž suoksīs poli

***

bez tuo vysa
kas manī
ar glazūreitim capumim i
svātku sajiutom
apslāptys nažu smaileitis
i uzroksti – take care

***

atbreivoj atbreivoj
gaisa plyusmu nu īkšīnis
lai sadoncoj par valpurģu nakti
tovys naramdynomuos
palākzylacainuos
i sasprāguojušlyupainuos
īgrybys
otkon i otkon
tikai mutautā izspļautuo sirds
zynuos ka golam nav suokuma
a tam nav beigu

***

itūnakt taida nakts
nikaida
ni zvaigžņu ni puosoku
viņ dabasu malnums
nostaļginizej
iz golda miniaturys
spieļu mašineitis
izslāgta Fire signalizaceja
luočam sabučuotam da leitovom
kažukā
viersā par breinumim
sepinej mozs ciļvieceņš

***

gribīs iz sātu
dūmuos symtreižu izīti zynomī celi
izsmaržuoti cereni
izbrysta upe
gribīs iz sātu
laiks ir prīškā

***

smuordej
puspasauļam dzaltoneigs tvons
i kura lobuoka atlaižu karte
tom sajiutom
kas nu vakar
nav kū dareit itymā sātā
zylam luočam
savalta vylna
nu bučuošonys pyrms godim četrim
tovu ocu pastuosts
izabeidz Vysuma “Nikod”..

***

maņ pateik zylgonsoltainā reitā/
kopejis syltuma pasacielīnī/
aizrunuot sova reita pyrmū/
i otkoneigū suocīni/
kai darosts/
orhideja jau atsaver