“Pi myusim Latgolā” – par Rēzeknis muzykys vydsškolys vargaņu klasis jubileju
Itūgod Juoņa Ivanova Rēzeknis muzykys vydsškola atzeimoj vargaņu klasis 25 godu pastuoviešonys jubileju. Raidejuma “Pi myusim Latgolā” veiduotuoji gasteja pi varganistis Gunys Kisis, kurei poša nazkod absolvējuse itū izgleiteibys programu.
Niu Guna Kise ir vīna nu zynamuokajom varganistem Latgolā, i vargaņu muzykys festivals “Latgales ērģeļu dienas” bez juos vuorda nav īdūmuojams. Tok poša varganiste stuosta, ka varganiste Bernadeta Everse Juoņa Ivanova Rēzeknis muzykys vydsškolā izvuicejuse na viņ vīnu ari aiz Latvejis rūbežu zynomu varganistu.
Atzeimojūt itū vargaņu klasis jubileju, kai leluokuo kulminaceja beja koncertizvadums “Māras zemes ērģeļu gaisma”, kur pīsadaleja vargaņu klasis absolventi. Pyrma poša pasuokuma tyka filmāti video fragmenti, kur varganisti spielej sovys dzymtuos pusis bazneicuos. Guna Kise pastuosteja, ka daļa varganistu cīši seņ nav spielējuši bazneicuos, kas atsarūn jūs dzymtajā pusē. Taipoš ituo leluo pasuokuma veiduošonā pīsadalejs ari kuorsavīts, akters i muzykants Kristaps Rasims.
