Izsludynuoti “Vuolyudzāni” i latgalīšu volūdys i kulturviesturis olimpiade
22. aprelī Rēzeknis Vaļsts 1. gimnazejā nūtiks 17. skotuvis runys konkurss “Vuolyudzāni” i atkluotuo latgalīšu rokstu volūdys i kulturviesturis olimpiade, informej Latgalīšu volūdys, literaturys i kulturviesturis školuotuoju asociaceja (LVLKŠA).
Skotuvis runys konkurss “Vuolyudzāni” ir īkļauts Latgolys kongresa symtgadis pasuokumu skaitā. Konkurss nūteik vairuokuos vacuma grupuos: pyrmsškola, 1.-4.kl., 5.-8.kl., 9.-12.kl., kai ari studenti. Kotram dalinīkam juosagatavej 2 daiļdorbu fragmenti latgaliski, kuru garums navar puorsnēgt 3 min. Vīnu dorbu īteicams izalaseit par patriotisku temu.
Itūgod nu vīnys školys taipat pīsadola na vairuok par 2 školānim nu kotrys klašu grupys, taipat nu vīnys školys dasaceitajim dalinīkim nav īteicams jimt vīnaidus dorbus. Iz konkursa navest dailrunuotuoju, kurī nazyna sovu tekstu nu golvys.
Viertej dorba atbiļsteibu vacumam, teksta zynuošonu, izskotu i stuoju, kontaktu ar klauseituojim, prasmi atkluot daildorba nūskaņu, īsakļaušonu laikā.
Īteicams organizēt konkursa atlasis kuortu školuos.
Olimpiadis mierki ir školu jaunuotnis vydā veicynuot vītejūs kulturys vierteibu apzynuošonu i izcyluokūs nūvodnīku lobuoku pazeišonu. Olimpiadis dalinīki ir vyspuorizgleitojūšūs školu 10.–12. klašu i augstškolu komandys 3–5 cylvāku sastuovā, kuri kolektivi aizpylda olimpiadis aizdavumus: testu, aizdavumus latgalīšu rokstu volūdā, rodūšūs dorbus, taipat nūteik ari školānu dorbu prezentacejis.
Itūgod olimpiadis aizdavumu temys:
1) latgalīšu rokstu volūda (rokstu volūdys prasmis);
2) latgalīšu teicīni (frazeoloģismi);
3) Latgolys kongresam — 100;
4) Vladislavam Luočam — 105;
5) Latgolys kulturtests (myusu dīnu latgaliskī pasuokumi, nūtykumi, jubilejis).
Olimpiadis i skotuvis runys konkursa uzvarātuojim šūgod byus lelys puorsteiguma bolvys
Školys teik aicynuotys iz konkursu i olimpiadi dasacejumu raksteit iz atseviškis lopys ar školys direktora voi direktora vītnīka izgleiteibys jūmā parokstu.
Skotuvis runys konkursa “Vuolyudzāni” nūlykums
