18. i 19. martā Rēzeknē nūtiks Latvejis amatīrteatru īstudiejumu regionaluo skate “Gada izrāde 2016”, pīduovojūt divejuos dīnuos nūsavērt devenis izruodis, informej Rēzeknis Kulturys i turisma centra puorstuove Maija Upeniece. Tūs skaitā ari divejis izruodis latgalīšu volūdā: Rēzeknis Tautys teatra “Pupas” i Baļtinovys nūvoda teatra kūpys “Palādas” izruode “Lauku kurorts piļsātnīkim”.

Rēzeknis Tautys teatra izruode “Pupas”, kas naseņ sajāmuse Latgalīšu kulturys goda bolvu “Boņuks 2016” kai lobuokais snāgums skotivis muokslā, tiks ruodeita 18. martā 13.00 Rēzeknis kulturys nomā. Sovukuort izruode baļtinavīšu izruode “Lauku kurorts piļsātnīkim” tamā pošā dīnā 20.00 Rēzeknis kulturys nomā.

Skatis laikā byus vareiba redzēt ari Jākubpiļs nūvoda, Leivuona nūvoda, Varakļuonu, Guļbinis nūvoda, Kūknesis, Leiksnys i Daugovpiļs kolektivu īstudiejumus latvīšu literarajā i krīvu volūdā.

Rēzeknē amatīrteatru snāgumu viertēs režisors Valdis Lūriņš, režisore Inese Mičule i teatra kritike, teatra portala kroders.lv redaktore Ieva Rodiņa. Lobuokūs īstudiejumus žūreja izvierzeis skatis finalam, kas nūtiks 22. i 23. aprelī Dailis teatrī, kur apmāram 10 veiksmeiguokī īstudiejumi sasaceņss par golvonū titulu “Gada izrāde 2016”.

Dīnys belets (dereigs iz vysom vīnys dīnys izruodem) 3 eiro, školānim, studentim i pensionarim – 2 eiro. Tūs var īsaguoduot Rēzeknis KN (tālr. 64622066) i Rēzeknis Nacionalūs bīdreibu KN kasē (tālr. 64622182).