27. aprelī Latgolys viestnīceibā GORS, simboliski īzeimejūt Latgolys kongresa symtgadis atceri i Latvejis vaļsts symtgadi, tiks izruodeits atjaunuotais literari muzykalais izvadums “Francis”, kas veļteits gareidznīkam, literatam, vaļstsveiram i sabīdriskajam darbinīkam Fraņčam Trasunam, pīduovuota dažaida Latgolys kulturviesturei veļteita dokumentalūs kinu programa i nūtiks eiskinys “Pyrmī osni” pyrmizruode, informej Latgolys viestnīceibys GORS puorstuove Edeite Husare.

Apreļa beiguos taišni pyrma 100 godu, 1917. goda 26. i 27. aprelī piec vacuo stila (9. i 10. majā piec jaunuos laika skaiteišonys sistemys), Rēzeknē nūtyka Latgolys kongress, kurs lyka pamatus Latvejis vaļsts dybynuošonai. Majā gaidomais Latgolys Symtgadis kongress i tuo nūtikšonu programa byus vīna nu centralajom Latvejis vaļsts symtgadis svieteišonys atkluošonys nūtikšonom, atzeimojūt viesturiskū Latgolys lāmumu apsavīnuot ar Kūrzemi i Vydzemi. Nu jau 27. aprelī Latgolys viestnīceibā GORS paradzātys vairuokys aktivitatis, kurūs mierkauditoreja, kab veicynuotu zynuošonys i izpratni par Latgolys i Latvejis viesturē nūzeimeigom nūtikšonom, pamatā ir Latgolys školu jaunīši.

27. aprelī 15.00 sevkurs interesents i eipaši pamatškolu i vydsškolu klašu grupys aicynuoti nūsavērt literari muzykalū izvadumu “Francis”, kas veļteits gareidznīkam, literatam, vaļstsveiram i sabīdriskajam darbinīkam Fraņčam Trasunam. Vysu dīnu nu 11.00 da 19.00 byus vareiba vērtīs dokumentaluos kinys par Latgolys kulturviesturi – “Latgales Māras ceļš” par Latgolys atbreivuošonys pīminekļa “Vienoti Latvijai!” viesturi nu tuo īceris da atjaunuošonys, “Izdzeivuot pīdereibu. Dzeive gleznuos” par dzejnīku, muokslinīku, sabīdriskū darbinīku Ontonu Kūkuoju, “Laiku i myuža roksti” par rakstnīka Ontona Rupaiņa dzeivi i daiļradi, “Juoņa Klīdzēja dabasu puse” par rakstnīka Juoņa Klīdzēja dzeivi i daiļradi i cytys kinys. 19.00 nūtiks pārņ radeituos eiskinys “Gambits 1917” turpynuojuma, eiskinys “Pyrmī osni” pyrmizruode. Eiskinys viestej par laiku taišni pyrma Latgolys kongresa i pošu kongresu.

Literari muzykalajā izvadumā “Francis” koncentrātā i saistūšā veidā tiks atkluotys gareidznīka, literata, vaļstsveira i sabīdriskuo darbinīka Fraņča Trasuna dzeivis i dorba puslopys. Izvadums “Francis” roduos 2014. godā, atzeimojūt Fraņča Trasuna 150. godadīnu i da šam bejs izruodeits viņ div reizis. Izvaduma autori ir režisore Māra Zaļaiskalns, dzejneica Anna Rancāne, muzykaluo konsultante Ilona Rupaine. Izvadumā pīsadola akteri Oskars Lustiks, Aldis Leidums, Imants Spīčs, Ināra Apele i deju kūpys “Dziga” doncuotuoji. Literari muzykalū izvadumu spūdrynuos Zanis Pumpuris-Prāmniecis “Smilšu kino” smiļkšu zeimiejumi. Izvadumā pyrmū reizi izmontuotys na tik Trasuna fabulys i dzejis, nu ari runys. Tymā atspīgeļuoti viesturiskī aspekti – suocūt ar Trasuna bierneibu, gaitom Pīterpilī, Saeimā i pieškū smierti, nailgi piec Leldīņu, kod jis izzynuoja par sovu izsliegšonu nu Bazneicys. “Francis” sajiems ari Latgalīšu kulturys goda bolvu “Boņuks 2014” kai goda lobuokais snāgums skotivis muokslā.

Beleti iz izvadumu “Francis” nūpierkami Latgolys viestnīceibys GORS i “Biļešu Paradīze” beletu sistemuos, beletu cena 3 eiro. Kinu programa byus apsaverama bez moksys. Telefons grupu apmekliejumu dasacejumim i beletu rezervacejai: 64633303.

27. apreļa nūtikšonys teik eistynuotys ar Vaļsts kulturkapitala fonda projekta “Latgales kongresa simtgades pasākumi Latgales vēstniecībā GORS” i Rēzeknis piļsātys dūmis atbolstu. Latvejis vaļsts symtgadi atzeimuos nu 2017. da 2021. goda, kab aptvartu i pylnvierteigai izstuosteitu vaļsts veiduošonys stuostu. Nūzeimeigu lūmu tamā ījam ar Latgolu saisteitys nūtikšonys, kurūs centraluo ass ir viesturiskais Latgolys kongress – Latgolys pyrma symts godu pījimtais lāmums apsavīnuot ar Kūrzemi i Vydzemi ceļā iz naatkareigu Latvejis vaļsti. Aktivitatis projektā “Latgales kongresa simtgades pasākumi Latgales vēstniecībā GORS” ir vīna nu Latvejis vaļsts symtgadis svieteišonys nūtikšonom.