Majā Viļānu tiergā nūtiks “Orūdu svātki”
14. majā meistari, kolekcionari, restauratori, retro pērļu cīneituoji, antikvariata i lītuotūs sadzeivis prīškmatu, mebeļu i drēbu tierguotuoji i cyti interesenti puļcēsīs Viļānūs tierdzeņā “Orūdu svātki”, kas nūtiks jau īrostuo Viļānu godatierga laikā tierdzeņam eipaši paradzātā vītā Lauku īlā, viestej Viļānu nūvoda sātys lopa.
Da 10. apreļa tierguotuoji vēļ teik aicynuoti dasasaceit. Eipaši aicynuoti atsasaukt tī meistari, kas var pīsadaleit pasuokumā ar rodūšajom darbneicom. Tierdzeņa “Orūdu svātki” dalinīkim juosyuta sovs dasacejums iz tirgus@vilani.lv:
- temats: “Tirgus 14.05.”;
- dasacejumā juonūruoda:
- personys dati – uzjāmums / vuords i pavuorde
- registracejis dati (personys kods, registracejis nr.)
- precis voi pakolpuojuma aproksts
- tierdznīceibys vītu skaits (1 tierdznīceibys vīta ir 3×3 m ar vītu mašynai)
Tiergā “Orūdu svātki” paradzātys ari cytys nūtikšonys. Par pīmāru, arhitekts i restaurators Pīters Blūms daleisīs sovā pīredzē divejuos lekcejuos: 11.00 “Ludzas sinagogas restaurācija” i 13.00 “Vecas koka mājas un kā ar tām sadzīvot”.
Tierga dīnā Viļānūs sabrauc symtim cylvāku nu vysys Latvejis, kab atrostu tū, kū ir gryuši nūpierkt niu vysim tik īrostajuos īsapierkšonys vītuos, kai ari – kab īsaguoduotu kaidu īcīneitu gordumu pi tierguotuoju ar garuokajom ryndom. Juojam vārā, ka taišni maja tiergs kotru godu puļcej vysleluokū piercieju skaitu.
