Daugovpiļs teatrī pymizruodi pīdzeivuos Latgolys kongresa symtgadei veļteita izruode
Daugovpiļs teatrī 6. majā nūtiks pyrmizruode īstudiejumam “Nūgrymušõ pile”, kas ir veļteita viesturiski nūzeimeigajam Latgolys kongresam, kas nūtyka 1917. gadā, pījamūt lāmumu Latgolai apsavīnuot ar Kūrzemi i Vydzemi ceļā iz naatkareigu Latvejis vaļsti, informej teatra puorstuove Janīna Ivanova.
Latgolys kongresa symtgadei veļteituos izruodis “Nūgrymušõ pile” pamatā ir īvāruojama latgalīšu i latvīšu kulturys i gareiguo darbinīka, vaļstsveira i literata Fraņča Trasuna luga. Tei ir veiduota iz varūņteiku pamata, kurymā caur mitim, kas apvīnuoti ar viesturisku realitati, teik aktualizāta spieceiga nacionaluo ideja i identitate. Jau itūšaļt Daugovpiļs teatrī nūteik dorbs pi ituos lugys īstudiešonys, kuo rezultatā tiks radeita muzykala izruode latgalīšu volūdā, kurai muzyku sarakstejs komponists Kārlis Lācis, nu horeografeju veidoj Agris Danilevičs.
Izruodis režisors ir Olegs Šapošnikovs, scenografis i kostimu muokslineicys – Inga Bermaka Apiaha i Agnese Leilande. Īstudiejumā pīsadaleis ari Daugovpiļs kors “Daugava” Jevgenija Ustinskova vadeibā, kurs ir ari īstudiejuma muzykalais vadeituojs. Īstudiejumā īsaisteiti ari zynomi gostu muokslinīki – Juoņs Jarāns i Jurijs Djakonovs.
Tyvuokuo izruode Daugovpilī 7. majā 17.00, nu piec pyrmizruodis itū īstudiejumu varēs nūsavērt ari Reigā – 15. majā Latvejis Nacionalajā teatrī.
Beleti īprīškpuordūšonā nūpierkami “Biļešu paradīzes” kasēs vysā Latvejā i škārsteiklā.
