Nailgi pyrma ļusteiguos leiguošonys i Juoņa dīnys raidejuma “Pi myusim Latgolā” veiduotuoji gastej Stiernīnē, kur jau vairuokus godus dzeivoj labi zynomais koru dirigents Juoņs Grudulis. Kab dazynuotu, kai paīt itaida muzykala cylvāka kasdīna i kai Juoņs Grudulis svietej Juoņa dīnu, pi energiskuo kunga nūbrauce Laura Sondore-Strode.

Juoņs Grudulis ar muzyku saisteits jau nu jaunu dīnu. Jamūt pīmāru nu bruolāna, jis muzykys školā suoce vuiceitīs saksofona spēli. Sovpus, suocūt vuiceibys Rēzeknis muzykys vydsškolā, jis jau struoduoja par muzykys školuotuoju i koru dirigentu.

Vysspūdruok Juoņa Gruduļa vuords saisteits ar veiru kori “Olūts”, kurū jis pats izveiduojs 1979. godā Viļānūs. Dirigenta sīva Ilze atkluoj, ka veira profeseja ir cīši gryuta, partū ka viņ ratais apjādz tū dorbu, kas juoīgulda, kab sasagataveitu mieginuojumim.

Gruduļu saimei ir ari sovys Juoņa dīnys svieteišonys tradicejis. Sīva Ilze parosti vyn vaiņukus, sovpus pats Juoņs vysod rauga leiguot da reita gaismys.