Ar Lauku atbolsta dīnasta atbolstu da 2018. goda  juļa Viļānūs tiks realizāts projekts “Kur bitis, tī mads”, informej Viļānu kulturys noma muokslinīciskuos dalis vadeituoja Agita Vigupe. Tuo rezultatā Viļānu kulturys noma deju kūpai “Kūmys” tiks izgataveits etnografiskais tautystārps, bet lauku kapela “Bumburneicys” i bārnu folklorys kūpa “Biteites” sajims muzykys instrumentus – vijūli i ceitaru. Projekta laikā tiks radeita ari jauna koncertprograma “Kur bitis, tī mads”, veļteita Viļānu piļsātys 90 godu jubilejam.

Viļānūs ir cīši styprys tautys muzykys i deju tradicejis. Pošdarbeibys kolektivi ir naatjemama Viļānu nūvoda kulturys dzeivis sastuovdaļa. Lauku atbolsta dīnasts ir apstyprynuojs Viļānu kulturys noma kolektiva i Viļānu nūvoda pošvaļdeibys izstruoduotuo projekta “Kur bitis, tī mads” īsnāgumu atkluotajam projektu īsnāgumu konkursam Latvejis Lauku atteisteibys programys 2014.-2020. godam apakšpasuokuma 19.2 “Darbības īstenošana saskaņā ar sabiedrības virzītas vietējās attīstības stratēģiju” aktivitatē 19.2.2 “Vietas potenciāla attīstības iniciatīvas.” 

Ar projekta paleidzeibu paradzāts vysaiduot kulturys aktivitatis vītejim dzeivuotuojim, nūdrūsynuot Viļānu kulturys noma jaunizveiduotū deju kūpu “Kūmys” ar 10 sīvīšu i 10 veirīšu etnografiskūs tautystārpu komplektim. Tautystārps kai volkuotuoja vizitkarteņa paruoda ari kotra nūvoda eipašū raksturu. Ituo projekta ītvorūs pyrmū reizi deju kūpai tiks izgataveits etnografiskais tautystārps, kurs vysprecīzuok atbiļss tārpu volkuošonys tradicejai Viļānu apvydā 18.-19. gs., palīkūt ari par dzymtuo nūvoda pazeišonys zeimi. Planavuots nūdrūsynuot lauku kapelu “Bumburneicys” i bārnu folklorys kūpu “Biteites” ar muzykys instrumentim – vijūli i ceitaru, kas vajadzeigi amatīrkolektivu kvalitativai darbeibai, kulturys pasuokumu reikuošonai i tradicionaluo kulturys montuojuma saglobuošonai.

Latvejis vaļsts symtgadi gaidūt i gatavejūtīs Viļānu piļsātys 90 godu jubilejam, ir paradzāts 2018. goda februari veļteit sovai piļsātai, reikojūt pasuokumus dažaidom vacuma i interešu grupom. Svātku mieneša nūslāguma pasuokumam 24. februarī tiks radeita koncertprograma “Kur bitis, tī mads”, kū veiduos horeografs i deju kolektiva “Kūmys” vadeituojs Ilmārs Dreļs, kapela “Bumburneicys”, kab prīcynuotu na tik sova nūvoda dzeivuotuojus, bet koncertātu ari cytūs Latvejis nūvodūs, tai popularizejūt Latgolys tradicejis i unikalitati dejā i tradicionalajā muzykā.

Projekta kūpejuo summa ir 7341.59 eiro, publiskais (ELFLA) finansiejums – 6175, 42 eiro. Projekts tiks eistynuots nu 2017. goda juļa da 2018. goda  juļa.

Karteņā: Senioru deju kūpa “Kūmys” ituo gods 4. majā