Catūrtdiņ, 21. septembrī, Preiļūs, kebabneicā “Hasans”, nūtyka latgaliskys avangarda muokslys pasuokums – Gunāra Indričāna personalizstuodis “Grybātuos atminis” atkluošona. Izstuodē ir apsaverami 14 dorbi sovpateigajā i muokslinīkam rakstureigajā peintisma stylā.

Da ituo Gunārs, kuruo dzymtuo puse ir Rēzeknis nūvoda Vertukšne, vaira beja zynoms ar sovim video i audio dorbim, pazeistams kai slovonuokais latgalīšu underground kulturys aktivists. Vysā Latvejā ļauds zyna filmys “Magnetafonščiks”, “Lykuma draugi”, “Začeišu pierteņa”, kai ari populari ir Dj Guntix i “Jis i jī, kam nav bolsa” skaņdorbi, bet pādejā laikā socialajā teiklā Facebook sovu atpazeistameibu dabuojuši ari Gunāra vizualī dorbi, kuru pamatā ir ideja kai par socialom i sabīdreibā aktualom, tai ari autoram cīši personeigom temom.

Izstuodis atkluošonā muokslinīks, uzrunojūt saguojušūs i prīcojūtīs par nūtikšonu, pasadaleja ar sovom atmiņom par Preilim: “Jūprūjom jiutūs puorsteigts i šokēts, ka stuovu ite – Preiļu centrā! Pādejais muns ceļuojums beja iz Maltu…vakar… Bet nu liktiņs ir aizveds jau cytur – iz piļsātu, kas maņ patīsi pateik. Preiļūs pyrmū reizi beju pyrma aptuveni 8 godu – vedem ar tāvu pīna paraugus analizem iz laboratoreju. Preiļūs īvāruoju i īvylku paralelis ar sev seņ zynomū Maltu, īraugūt obejom apdzeivuotajom vītom rakstureigū romu tauteibys minoritati. Atausa atmiņā školys godi… Palyka sylts… Preiļūs pīdzyma muns pyrmais dāls –taitod Preili ir deveiga, lāskova piļsāta. Preiļūs “STIHL” zuodži veikalā ir lātuoki nakai Rēzeknē. Verūs, ka i muiža pamozam atdzymst. Lai slave!”

Tai kai muokslys dorbu topšonā nūzeimeiga lūma ir ari Microsoft programai Paint, kurei radeita 1985. godā, bet kurūkompaneja planavoj vaira naatteisteit i naatjaunuot. Leidza ar tū dorbi ir kai sova veida līceiba programai, ar kurū izaugušys niu jau vairuokys paaudzis. Muokslinīks izstuodis atkluošonā prīšklasejuma veidā ar programys viesturi i prīškdīnom īpazeistynuoja ari nūtikšonys gostus.

Izstuodi “Grybātuos atminis” vysi “Hasana” apmaklātuoji varēs apsavērt vysmoz mienesi, bet, ka byus iņterese, tod izstuodis ilgums tikšūt pagarynuots. Taipat ir plani, ka iz prīšku dorbi varātu byut apsaverami i cytuos vītuos Latvejā. Izstuodi organizej i atbolsta mecenati Laura i Jurs Vucāni.

Publicitatis kartenis