“Pi myusim Latgolā” viestej par festivalu “ORGANismi”
Jau trešū rudini piec kuortys Latgolys viestnīceibā GORS Rēzeknē īzaskaņ varganis. Koč i īrosts, ka tys muzykys instruments dzierdams viņ bazneicā, festivalā “ORGANismi” itys stereotips teik veiksmeigi lauzts.
“Festivals nūteik jau trešū reizi. Pošim ruodīs, ka intensitate ir dīzgon lela, partū ka gataviešonuos festivalam nūteik vysu godu. Kai izskaņ vīns festivals, suocom dūmuot par nuokušūs,” stuosta Latgolys viestnīceibys GORS muokslinīciskuo vadeituoja Ilona Rupaine. “Itamā reizē mes cīši daudz struoduosim, kab vargaņu skaniejumu i varganis kai instrumentu īmeiļuotu piec īspiejis dažaiduoka auditoreja. Myusu tīšais mierkis itamā reizē ir saimis i bārni. Div pasuokumi dūmuoti taišni itai mierka grupai.”
Festivala “ORGANismi” rodūšuo komanda aktivi struodoj pi tuo, kab pasuokumu apmaklātuoji iz varganem pasavārtu nu cyta skotpunkta i nasabeitu, ka tys ir viņ bazneicai dūmuots muzykys instruments.
Festivala organiziešonā lelu pīnasumu davuse pasaulī zynomuo varganiste, riezeknīte Iveta Apkalna, kura kotru godu iz daleibu festivalā aicynoj atpazeistamus varganistus, kuri muok izkuopt nu īrostūs ramu.
