Paziņuoti gruomotu muokslys konkursa “Zelta ābele 2017” nominanti. Bolvu par myuža īguļdejumu gruomotnīceibā daškeirs Juoņam Elksnim, Latgolys kulturys centra izdevnīceibys vadeituojam. Paziņuoti ari kandidati iz bolvu septeņuos kategorejuos.

Juoņs Elksnis dzims 1933. goda 21. oktobrī Drycānu pogosta Asinovā kai vacuokais dāls septeņu bārnu saimē. Suokumā Juoņs Reigys 2. Poligrafejis muokslys orūdškolā apgiva burtliča profeseju. Par pyrmū dorba vītu kliva PSRS Zynuotņu akademejis tipografeja Moskovā. Piec dīnasta armejā Juoņs atsagrīze dzymtajā pusē, struoduoja pedagogiskū dorbu Rēzeknis 14. orūdvydškolā, nakluotīnē pabeidza Daugovpiļs Pedagogiskuo instituta Filologejis fakuļtati. Tūmār sirdī beja vieliešonuos atsagrīzt poligrafiķa profesejā. Itaida īspieja roduos Atmūdys laikā – 1990. godā J. Elksnis atjaunuoja gondreiž pusgodsymtu puortrauktū latgalīšu gruomotu izdūšonu.

Latgolys Kulturys centra izdevnīceibā aba, kai tū sauc tautā, Elkšņa izdevnīceiba, gondreiž jau treisdesmit godus izdūd gruomotys latgalīšu rokstu volūdā, ceļūt gaismā gon pyrmskara latgalīšu literaturys paraugus, gon pulcynojūt ap sevi myusu dīnu autorus. Kai zynomuokī izdavumi, mynomi kulturviesturiskuo goda gruomota “Tāvu zemes kalendars” i literaturys almanahs “Olūts”. Latgolys Kulturys centra izdevnīceibā izīt gruomotys ari latvīšu literarajā volūdā i krīvu volūdā.

Pošaizlīdzeiguo gruomotizdevieja dorbs nūvārtāts ar Treju Zvaigžņu ordini (1994), Latgalīšu kulturys goda bolvu “Boņuks”, bolvu “Latvijas lepnums” (2013). J. Elksnim daškierts Rēzeknis Gūda pylsūņa nūsaukums.

“Zelta ābele 2017” nūslāguma ceremoneja nūtiks 14. martā Reigā, Lelajā gildē.