Svātdīņ, 20. majā, Daugovpiļs nūvoda Naujenis pogosta Slutišķu sādžā nūtiks Storptautyskais tautys muokslys festivals “Augšdaugava”, kura moto itūreiz skaņ „Simtiem loku izlocīju”, simboliski īzeimojūt Latvejis vaļsts symtgadis sviniešonu gleznainuos liktiņupis Daugovys lūkūs.

Festivalu reikoj Daugovpiļs nūvoda pošvaļdeiba ar mierki popularizēt Augšdaugovys aizsorgojamū dobys teritoreju, kulturys montuojumu i tradiceju daudzveideibu, veicynuot amatnīceibu i turisma atteisteibu, sekmēt Daugovpiļs nūvoda īdzeivuotuoju rodūšu aktivitati, styprynuot puorrūbežu sadarbeibu.

Ituo goda festivala programā paradzātys daudzys spylgtys nūrisis Slutišķu staraveru sātā. Muzicēs folklorys ansamblis “Iļjinskaja pjatņica”, kas popularizej Latgolys staraveru materialū i goreigū kulturu, izpylda autentiskus dzīduojumus i horeografeju.

Naujenis nūvodpietnīceibys muzejs atkluos izstuodi “Kaimiņu stāsts. Jaunā sādža”, kas topuse zynuotniskajā ekspedicejā, pietūt Neicgalis pogosta Jaunuos sādžys staraveru kūpīnys viesturi i kulturys montuojumu. Sovukuort Vabalis, Leiksnys, Dubnys, Ambeļu i Daugovpiļs nūvoda Kulturys centra “Vārpa” amatirteatri Džīsmu duelī izspēlēs, izdzīduos i izdzeivuos latvīšu dzīsmis.

Festivala atkluošona nūtiks 13.00 Latgolys sātā ar koncertu „Simtiem loku roku rokā“. Koncerta eipašī gosti byus dzīduotuojs Nikolajs Puzikovs i grupa “Baltie lāči”.

Dīnys koncertūs i Lelkoncertā pīsadaleis gon myusdīnu, gon tautys deju kolektivi nu Daugovpiļs nūvoda, kaimiņvaļsts Lītovys, ari nu Alūksnis, Daugovpiļs, Dūbelis, Ierglim, Indrys, Reigys i Usmys.

Pasuokuma apmaklātuoji poši varēs īskandynuot Augšdaugovys lūkus ar skaneiguokū saucīni. Jamūt leidza spylvynu, festivala apmaklātuoji saguoduos sev ārtu sādvītu i varēs pīsadaleit aizraujūšā spylvynu ceiņā. Mozī apmaklātuoji, puorvorūt symts izzinis sūļus Daugovys lūkūs, varēs puorbaudeit sovys spiejis, giut īspaidu i vuiceitīs.

Festivala programā paradzāta laivu braucīņa “100 laivas Latvijai” dalinīku sagaideišona Slutišķūs.

Publicitatis karteite.