Latvejis simtgadis svineibu ītvorūs nu maja leidz novembram Rēzeknis Kulturys i turisma centrs aicynoj sevkuru Rēzeknis piļsātys voi nūvoda īdzeivuotuoju daleitīs ar sovim saimis stuostim, atmiņom i viesturis līceibu fotokarteitem, kab kūpeigi veiduotu fotostuostu kolekceju “Runā Latgale”.

Virtualuos izstuodis mierkis ir rūsynuot īsavērt sovā saimē i atkluot saimē dzierdātūs stuostus. Montuotī prīkšmati i albumi, sevkurs personiskais stuosts ir naapraksteituo Latvejis viesturis daļa i laikmeta līceiba. Taišni vairuoku paaudžu saglobuotuos fotografejis i prīkšmeti, kuri teik paturāti saimēs i nūdūti bārnu bārnim, roda eipašu saikni ar dzymtu. Sovutīs stuosti par prīkšmetim paleidz lobuok izzynuot Latvejis viesturi i cylvāku liktiņus.

Ja ari tovā eipašumā ir kaids sens i interesants prīkšmats (fotografejis, rūtaļlītys, trauki, apgārbs, viestulis i tt.), ar kuru ir saisteits kaids atmiņu stuosts par Rēzekni, Rēzeknis nūvodu voi viesturiskū Rēzeknis apriņči, tod nūfotografej, dalic atmiņu stuostu (fotografejis gadejumā – ari aprokstu ar karteitē radzamajim cylvākim) i syuti iz maija.upeniece@rezekne.lv. Virtualuo fotostuostu kolekceja “Runā Latgale” byus apsaverama ite.

Aleksandra Bondarenko fotokarteite nu Latgolys Kulturviesturis muzeja izstuodis “Puori slīkšņam”

Ari Pyrmuo Latgolys kongresa karūgam ir sovs stuosts. Karūgs ir taps naktī pyrma 1917.goda kongresa pasuokuma, i tū darynuoja Jelgovys Zemkūpeibys školys školotuojis Lavīze Putniņa i Alīda Freimane. Itei škola Pyrmuo pasauļa kara laikā tyka evakuāta iz Rēzekni, iz Tierdznīceibys školys āku, kur nūtyka kongresa ūtruos dīnys pasuokumi. Piečuok školotuoja Lavīze Putniņa karūgu slēpe deča puorvolkā, bet piec školotuojis nuovis tys globuojās īcavnīku Viduleju saimē.