Juņa suokumā Kulturys ministrejis parlamentaruos sekretaris omotā stuojēs Marika Zeimule, informej ministreja. Īprīkš jei vadiejuse vidis aizsardzeibys i regionaluos atteisteibys ministra Kaspara Gerharda biroju, bet pyrms tam īgivuse vierteigu pīredzi vairuokuos kulturys nūzaris i kulturizgleiteibys īstuodēs. Latgolys sabīdreibai M. Zeimule pazeistama ari kai nūvoda tradicionaluos kulturys saglobuotuoja bīdreibā „Latgales tradicionālās kultūras centrs „Latgaļu sāta””. Parlamentaruos sekretaris dorbā Marika Zeimule izvirziejuse vairuokys prioritatis saisteibā ar Latgolu.

“Maņ cīši svareigi ir Latgolys izaugsmis vaicuojumi kulturys, volūdys i ekonomikys jūmā. Kulturys ministreja vērtēs Latgolys sabīdriskūs organizaceju īteikumus Nacionaluos identitatis, pylsūniskuos sabīdreibys i integracejis politikys pamatnūstuodņu nuokamūs godu planam,” portalam lakuga.lv atkluoj M. Zeimule.

Parlamentaruo sekretare uzsver, ka Latgolys medeju atbolsts ir bejs Kulturys ministrejis prioritate. Itūgod konkursa veidā pīejami vairuok nikai 140 000 eiro, M. Zeimule īsastuos par turpmuoku atbolstu Latgolys medejim, īskaitūt atbolstu plošsazinis leidzeklim, kuri saturu ražoj latgalīšu volūdā.

“Maņ pošai tyvi ir vaicuojumi, kas skar tradicionalū kulturu i namaterialuo montuojuma piecteceibys nūdrūšynuošonu. Uzskotu, ka vītvuordu uzrokstim Latgolā juobyut ari latgalīšu rokstu volūdā, juoatteista nūvodu vuiceiba, juovuica volūdu, lai gon tī ir vaicuojumi, kas juorysynoj cytom institucejom i pošvaļdeibom. Naaizmierssim, ka cīši daudz kas myusu kulturys i volūdys saglobuošonā i atteisteibā ir atkareigs nu myusu pošu i institucejom iz vītys Latgolā,” stuosta M. Zeimule.

Marika Zeimule īgivuse magistra grādu uzjiemiejdarbeibys vadeibā i augstuokū profesionalū izgleiteibu Latvejis Universitatis pedagogejis i psihologejis fakultatē.

Publicitatis karteite.