1938. goda 11. junī Ludzā rysynuojēs nūtykumi, kas piļsātys vaibstūs izdareja naatgrīzeniskys izmainis – piļsāta pīdzeivuoje pūstūšu guņsgrāku. Itūgod paīt 80 godi nu guņsgrāka, par nūdareitū pūstu līcynoj ludzuonīšu atmiņu stuosti i fotografejis. Ludzys Nūvodpietnīceibys muzejā, atguodojūt itū nūtykumu, apsaverama fotoizstuode “Ludza liesmās”.

Vīnu nu leluokajim i pūstūšuokajim guņsgrākim storpkaru Latvejā pīdzeivuoja taišni Ludza 1938. godā. Nūdaga vysmoz catūrtuo daļa piļsātys, pajumti pagaisynuoja gondreiž 2000 Ludzys īdzeivuotuoju, būjā eimūt piļsātys kūka apbyuvei.

1938. goda 11. juņa reits Ludzā beja korsts, sauss i viejains. Nazynoma īmasla deļ kaida gruomotu tierguotuoja Buņimoviča sātys jumtā pasaruodeja līsmis. Laikapstuokļu deļ līsmis dreiži puorsamatušs iz sūpluok asūšajom kūka sātom, i piec kaida laika līsmēs jau beja lela daļa piļsātys, pusstuņdis laikā aizadaga ap pīcdesmit āku. Piļsātys guņsdziesieji, garnizona karaveiri i īdzievuotuoji, naspādami apsluopēt līsmis, izsauce paleigus nu Rēzeknis, Daugavpiļs, Zylupis, pat Reigys. Līsmis turpynuoja izaplateit, aizadaga piļsātys policejis āka, katuoļu bazneica, piļsātys aptyka, lels skaits veikalu i dzeivuojamūs sātu. Līsmis skuore arī nabadzeiguokū piļsātys daļu, kur suoce degt ap pussymta sātu. Īdzeivuotuoji ceņtēs gluobt sovu jau tai tryuceigū maņteibu, svīžūt vysu azarā. Naspiejūt gluobt dagūšuos sātys, dziesieji ceņtēs gluobt puorejuos ākys nu līsmu, nūciertūt kūkus, nojaucūt sātmaļus i aplaistūt ākys ar iudini. Guņi īrūbežuot izadeve tikai vokorā, bet dziesšonys dorbi turpynuojuos vysu nakti.

Kūpumā nūdaga vaira kai 400 āku, nu tuom ap 100 veikalu, 17 sabīdriskuos ākys i katuoļu bazneica, kas beja lels zaudiejums piļsātai. Pareizticeigūs bazneicu, kuru ari skuore guņsgrāks, breinumainā kuortā izadeve izgluobt. Drupuos tyka atrasts vīns myrušais, kai ari vīns cītušais nūmyra vāluok slimineicā.

Piec guņsgrāka tyka izstruoduoti piļsātys puorbyuvis plani, kas paredzēja plašu modernizaceju, dasamāruošonu sovam laikmatam. Vystik piec īdzeivuotuoju lyugumim piļsātā tyka saglobuota vacuo kūka apbyuve i suokūtnejais planuojums, Ludza saglobuoja sovu viesturiskū apveidu, viņ īvārojūt jaunūs byuvu guņsdrūseibu.

Karteite: zudusilatvija.lv