Latgolys Kulturviesturis muzejs duovynuojumā sajiems ap 300 keramikys vacmeistaru i myusu dīnu pūdnīku dorbus
Rokstu sagataveja: portals lakuga.lv
Ituo goda juļs Latgolys Kulturviesturis muzejam ir bejs eipašs – muzeja kruojumā asūšuo keramikys kolekceja ir papyldynuota, pasasokūt Latgolys pūdnīceibys patrona, muokslys zynuotnīka Juoņa Pujāta muosys dāla Muorteņa Kruoņa vierteigajam duovynuojumam ar apmāram 300 keramikys vacmeistaru i myusu dīnu pūdnīku dorbim. Kai informej muzeja puorstuove Inga Klīdzēja, tys ir naatsverams davums vēļ piļneiguokai Latgolys pūdnīceibys kulturviesturiskūs sakņu i tendeņču atteisteibys apzynuošonai.
Vīns nu golvonūs Latgolys Kulturviesturis muzeja darbeibys vierzīņu ir Latgolys keramikys pietnīceiba i saglobuošona. Nu jau vaira par 50 godu muzejā teik nūpītnai struoduots pi Latgolys keramikys kolekcejis mierktīceigys komplektiešonys, pūdnīku biografeju, omota i keramikys veiduošonys procesu pietnīceibys.
Duovynuojums ir unikals i ar taidu vacmeistaru kai Odums Kuopusteņš, Polikarps Černavskis, bruoli Ryuči, Juoņs Backāns, Polikarps Vilcāns, Andrejs Paulāns, Zagorsku i Ušpeļu dzymtys i cytim dorbim, i taidu meistaru darynuojumim, kas da šam muzeja kruojumā ir puorstuovāti moz voi nav vyspuor (Juoņs Dubovskis, Ontons Peipāns, Ontons Melders, Ontons Bogdanovs, Julians Šērs i cyti).
Juopastreipoj, ka itū duovynuojumu veidoj Pujātu dzymtys keramikys kolekceja, kurā puorsvorā ir puorstuovāti dorbi, kurūs Juoņs Pujāts, byudams eists Latgolys keramikys iz augšu cāluojs i zynuotuojs, Latgolys pūdnīku dīnu tradicejis aizsuociejs, ir kolekcioniejs i apzynuojs nu vacmeistaru kai radzamus pūdnīceibys tradicejis paraugus Latgolā. Tymā ir ari poša Juoņa Pujāta, juo muosys Gabrielys Kruonis i juos dāla Muorteņa Kruoņa, kurim ari nav svešys ituo omota prasmis, veiduotī dorbi.
Pasasokūt itam duovynuojumam, Latgolys Kulturviesturis muzeja kruojumā niu jau byus apmāram 2800 keramikys dorbu lela kolekceja, kas spūdri i vysaptverūši atspīgeļoj Latgolys keramikys atteisteibu laiku gaitā.
Publicitatis karteite, Latgolys Kulturviesturis muzeja specialisti kūpā ar Muorteņu Kruoni, sajamūt Pujātu dzymtys keramikys kolekcejis duovynuojumu. Evitys Kozulis foto.
