Rokstu sagataveja: portals lakuga.lv

8. augustā Daugovpiļs teatra kolektivs sasatyka kasgadejā sezonys atkluošonys kūpsapuļcē, kab suoktu dorbu pi ituos sezonys jaunīstudiejumu. Kai informej teatra puorstuove Janīna Ivanova, jau novembrī pyrmizruodi pīdzeivuos ari īstudiejums latgalīšu volūdā – Nikolaja Gogoļa luga „Revidents”.

Itūreiz Daugovpiļs teatris sovu sezonu atkluos ar vīsizruodem Reigā. Septembrī VEF Kulturys pilī byus īspieja nūsavērt komedejis „Ekstrasensa cīņa” (3. septembrī) un „Hantele killeram” (4. septembrī), kai ari muziklu „Džeina Eira” (18. septembrī). Itūsezon Daugovpiļs teatris ari turpynuos aktivai pīsadaleit storptautiskūs festivalūs i jau septembrī dūsīs iz Boltkrīveju ar izruodi „Kazanova. Henrieta. Venēcija.”, sovukuort oktobrī iz Moskovu ar izruodi „Kailais karalis”.

2018./2019. goda sezonys pyrmuo pyrmizruode nūtiks 7. septembrī, kas byus Annys Brigaderis lugys īstudiejums „Raudupiete” teatra Eksperimentalajā zalā. Izruodis režisors ir Jurs Jonelis, titullūmuos: Kristīne Veinšteina i Vadims Bogdanovs.

Oktobrī pyrmū reizi Daugovpiļs teatrī gasteis režisore A. Korovkina nu Krīvejis i īstudēs te Aleksandra Ostrovska lugu „Negaiss” krīvu volūdā.

Novembrī skateituojus gaida pyrmizruode Nikolaja Gogoļa lugys „Revidents” īstudiejumam latgaliski Olega Šapošnikova režijā. Lugu Latgolys realejom adaptiejuse rakstneica i dramaturge Monika Zīle. Izruodē kūpā ar Daugovpiļs teatra akterim pīsadaleis ari Juoņs Jarāns i Roberto Meloni.

Turpynojūt tradiceju, decembra izskaņā Daugovpiļs teatrī paradzāts eipašs, svātkim veļteits Jaungoda koncerts.

Publicitatis karteite, autore Džeina Saulīte.