Rokstu sagataveja: portals lakuga.lv

Vosorys suokā gruomotu izdevnīceiba “Zvaigzne ABC” izdeve jaunu dzejūļu gruomotu bārnim “Rekur ir! Jauni dzejoļi Latvijas bērniem”, kurymā ir 17 autoru dzejūli bārnim. Tūs vydā ari desmit Ilzis Spergys ailenis latgaliski.

Gruomotā “Rekur ir!” sasatykuši kai slovoni i pazeistami dzejnīki, tai izlācūšuos zvaigznis i debitanti. Temys vysa dažaiduokuos – saime, bierneiba, škola, godalaiki, doba, dorbi, blienis, svātki i tūs svieteišona, Latveja i tuos gūdynuošona i, saprūtams, jūki, smaidi i smīšonuos. Gruomotys mierkauditoreja ir bārni ar dažaidu skaiteit i atguoduot variešonu – eisys ailenis sasamej ar poemys vuorda cīneigim dzejūlim. Gruomotu kūšuoku dora muokslineicys Ievys Maurītis izzeimuotī tāli – suneits, pelis, palāda, ziernyukleits, luoceits i cyti.

Dzejūli, kurī publicāti kruojumā, ir svaigi – vīni speciali gataveiti gruomotai, cytim “Rekur ir!” ir pyrmuo publikaceja drukavuotā veidā. Gruomotā publicātūs dzejūļu autori ir Leontīne Apšeniece, Agnese Blaua, Leons Briedis, Anda Dēliņa, Marija Gončare, Gita Groza, Daina Grūbe, Evija Gulbe, Jānis Keičs, Maija Laukmane, Guna Pitkevica, Ieva Samauska, Varis Siliņš, Iveta Skapste, Ilze Sperga, V. Vijolīte i Ināra Vilne. Gruomotu sakuortuoja redaktore Guna Pitkevica, i tei ir kai dzejnīku duovona vysim Latvejis bārnim i bārnim, kurī skaita latviski, vysā pasaulī Latvejis symtajā jubilejā – kab bārnim ari iz prīšku byutu jauni dzejūli, kurūs skaiteit leluokūs i mozuokūs svātkūs, konkursūs voi vīnkuorši kasdīnā.

Vysu dzejūļu vydā ir ari desmit latgalīšu literatis Ilzis Spergis dzejūli bārnim. Ilzi pīsadaleit kūpkruojumā aicynuoja poša izdevnīceiba, dzejūļu publikacejis pyrma tuo īvārojūt itepat latgalīšu kulturys ziņu portalā LaKuGa.lv. Gruomota “Rekur ir! Jauni dzejoļi Latvijas bērniem” vaicojama izdevnīceibys “Zvaigzne ABC” i cytūs gruomotu veikalūs vysā Latvejā.

Puorskaiteit Lakuga.lv publicātūs Ilzis dzejūļus var ite:

Sauleite šudiņ ar zūbim / Ilze Sperga. Bārnu ailenis I 

Vuškeņa iz pļovys / Ilze Sperga. Bārnu ailenis II 

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzeklim.