Roksta autors: portals lakuga.lv

Sastdiņ, 3. novembrī, iz Ūtrū pasauļa diktatu latgalīšu rokstu volūdā aicynoj “Latgalīšu kulturys ziņu portals lakuga.lv” i Latvejis Radejis Latgolys studeja. Diktats skanēs Latvejis Radejis 1 latgaliskajā raidejumā “Kolnasāta” 18.15 stuņdēs gon vysuos LR1 frekveņcēs Latvejā, gon škārsteikla tīšraidē vysā pasaulī.

Pasauļa diktats latgalīšu rokstu volūdā pyrmū reizi nūtyka 2017. godā, īsadvesmojūt nu iniciativys “Pasauļa diktats latvīšu volūdā”. “Latgalīšu volūda ir daļa nu latvīšu volūdys, i ir pošsaprūtami, ka ari latgaliski var raksteit diktatu. Iniciativys mierkis ir popularizēt latgalīšu volūdu i veicynuot tuos lītuojuma pīaugumu,” soka diktata idejis autore i portala lakuga.lv redaktore Vineta Vilcāne.

Nasaverūt iz tū, ka vairumam latgalīšu nav bejuse vareiba īsavuiceit sovys dzymtuos volūdys rokstu tradiceju, volūdai ir lela nūzeime gon kasdīnys saziņā, gon dažaiduos publiskuos aktivitātēs – tū var dzierdēt na tikai muzykā, bet ari reklamuos, kinuos i teatra izruodēs, skaitiet īlu nūruodēs, veikalu izkuortnēs i produktu nūsaukumūs, kai ari daudz kur cytur. 2011. gods tautys skaiteišonys dati ruoda, ka kasdīnā latgalīšu volūdu lītoj aptuveni 8,8% vaļsts dzeivuotuoju.

Ūtrais pasauļa diktats latgalīšu volūdā skanēs 3. novembrī Latvejis Radejis 1. programys latgaliskajā raidejumā “Kolnasāta” 18.15 stuņdēs gon vysuos LR1 frekveņcēs Latvejā, gon škārsteikla tīšraidē vysā pasaulī. Uzraksteitū tekstu sevkurs varēs puorbaudeit portalā lakuga.lv. Diktatu skaiteis Rēzeknis Tautys teatra aktirs Aldis Leidums, tuo teksts byus fragments nu Kārļa Skalbis latgaliski izdūtuos puosokys “Kačeiša patmalis”. Diktata teksts sastateits, īvārojūt 2007. godā apstyprynuotūs Latgalīšu raksteibys nūsacejumus.

Portals lakuga.lv dorbojās nu 2007. gods, kasdīnys latgalīšu rokstu volūdā viestejūt par Latgolys i latgaliskuos kulturys dzeivis aktualitatem. Portala eipašnīks ir bīdreiba “Latgolys Studentu centrs”, lakuga.lv saturs itūšaļt teik sagataveits ar Vaļsts regionaluos atteisteibys agenturys finansialu atbolstu nu Latvejis valsts budžeta leidzekļu.

Publicitātis karteite.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.