Rokstu sagataveja: portals lakuga.lv

Nūvodpietnīka Josifa Ročko gruomota “Знаменитые евреи Латгалии” (Slovoni Latgolys žeidi) ir autora veļtejums Latvejis vaļsts symtgadei. Kulturviesturiski nūzeimeiguo izdavuma pyrmuo siejuma attaisiešonys svātki nūtiks Daugovpilī 25. oktobrī 16.00 stuņdēs Latgolys Centralajā bibliotekā, informej bibliotekys puorstuove.

Jaunuo gruomota par slovonim Latgolys žeidim ir viesturnīka, nūvodpietnīka, Daugovpiļs žeidu kūpīnys muzeja “Ebreji Daugavpilī un Latgalē” dybynuotuoja i vadeituoja, Treju Zvaigžņu ordiņa kavalera J. Ročko narymstūšuo pietnīcyskuo dorba kuortejais vainaguojums – pyrmais nu div siejumu gondreiž divsymt godus garu laika pūsmu aptvarūšā pietejumā par īvārojamim Latgolys žeidim, kuri giva panuokumus i sabīdreibys atzineibu vysaiduos dzeivis darbeibys jūmuos. Gruomotys pyrmajā siejumā autors apkūpuojs zinis par 120 īvārojamim žeidim, kas pīdzyma i/voi dzeivuoja Daugovpilī (sovulaik – Dinaburgā i Dvinskā) nu 1820. da 1920. gods.

Taišni itūs symts godu laikā žeidu tauteibys īdzeivuotuoju skaits piļsātā beja vysleluokais. Tok taidi satrycynuojumi kai Pyrmais pasauļa kars, 1917. gods revoluceja, ceiņa par Latvejis naatkareibu i daudzkuortejis varys puormejis lyka piļsietnīkim, tūstorp žeidim, dūtīs lobuokys dzeivis mekliejumūs iz Krīveju voi Eiropu. Taids liktiņs dasadyurs ari lelai daļai Josifa Ročko jaunajā gruomotā apsavārtūs personu. Vairuokums tyka Krīvejis leluokajuos piļsātuos – Sanktpīterburgā (Leningradā) i Moskovā, tureiguokūs vacuoku piecteči – Eiropā i ASV, kur giva panuokumus kai rakstnīki i dzejnīki, muzyki, muokslinīki i akteri, zynuotnīki, mediki, juristi, vaļstsveiri i diplomati, ryupnīki i uzjiemieji, inžineri i arhitekti, rabini, pedagogi i militarpersonys.

Gruomotā ir izmontuoti autora agruokūs publikaceju, Vikipedejis, Ciklopedejis, eisuos žeidu enciklopedejis, škārsteikla vītnis “Dzimuši Daugavpilī” i cytu olūtu materiali.

Publicitatis karteite, kultura.daugavpils.lv.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.