Rokstu sagataveja: portals lakuga.lv

2018. gods 23. oktobrī 93 godu vacumā myužeibā nūguojuse kordirigente i muzykys pedagoge Terēzija Broka. 2013. godā jei sajēma Latgalīšu kulturys goda bolvu “Boņuks” par myuža īguļdejumu latgalīšu kulturys atteisteibā.

Terēzija Broka dzymuse 1925. goda 30. septembrī Rēzeknis apriņča Viļānu pogostā. Piec Latvejis Vaļsts konservatorejis beigšonys leidz pat 2000. godam juos vīneiguo pamata dorbavīta beja Daugovpiļs muzykys vydsškola, kur Terēzija Broka veice pedagogiskū i audzynuošonys dorbu kordirigentu nūdaļā. Daudzi juos audziekni niu struodoj par dzīduošonys školuotuojim, veic pedagogiskū dorbu muzykys vuiceibu īstuodēs, ir aktivi kulturys darbinīki, voda korus daudzuos Latvejis piļsātuos i lauku rajonūs, eipaši Latgolā. Paraleli pedagogiskajam dorbam Terēzija aktivi vadejuse pošdarbeibys korus, ansambļus, aktivi īsasaistūt sova nūvoda Dzīšmu svātku i cytu pasuokumu reikuošonā. Bejusa Školu jaunatnis Dzīšmu svātku viersdirigente, kai ari Vyspuorejūs latvīšu Dzīšmu svātku viersdirigente.

Terēzejis Brokys davumu Latvejis i Latgolys kulturys telpai gruomotā īmyužynuojuse Anna Rancāne, pavysam dreiž izīs pedagogei i dirigentei veļteituo gruomota.

Portala lakuga.lv kolektivs izsoka leidzjiuteibu Terēzejis Brokys saimei, draugim i audzieknim.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.