Roksta autors: portals lakuga.lv

Sastdiņ, 3. novembrī, ūtru reizi nūtiks diktats latgalīšu rokstu volūdā. Iniciativys mierkis ir popularizēt latgalīšu volūdu i veicynuot tuos lītuojuma pīaugumu. Ūtrais pasauļa diktats latgalīšu rokstu volūdā skanēs Latvejis Radejis raidejumā “Kolnasāta”, uzraksteitū tekstu varēs puorbaudeit “Latgalīšu kulturys ziņu portals lakuga.lv”. Kluotīnē diktatu varēs raksteit Daugovpiļs Universitatē.

Iz diktatu latgalīšu volūdā aicynoj “Latgalīšu kulturys ziņu portals lakuga.lv” i Latvejis Radejis Latgolys studeja. Diktats skanēs Latvejis Radejis 1 latgaliskajā raidejumā “Kolnasāta” 18.15 stuņdēs gon vysuos LR1 frekveņcēs Latvejā, gon škārsteikla tīšraidē vysā pasaulī. Kluotīnē diktatu varēs raksteit 13.00 stuņdēs Daugovpiļs Universitatē (Daugovpiļs, Vīneibys īla 13) 307. auditorejā.

Pasauļa diktats latgalīšu rokstu volūdā pyrmū reizi nūtyka 2017. godā, īsadvesmojūt nu iniciativys “Pasauļa diktats latvīšu volūdā”. Latgaliskuo diktata veiduotuoji pīduovoj diktatu uzraksteit viesturiskā latvīšu volūdys paveidā – latgalīšu rokstu volūdā.

Diktatā Rēzeknis Tautys teatra akters Aldis Leidums skaiteis fragmentu nu Kārļa Skalbis puosokys “Kačeiša patmalis” (izdeviejs: “Latvijas Mediji”, 2017). Uzraksteitū tekstu sevkurs varēs puorbaudeit portalā lakuga.lv. Diktata teksts sastateits, īvārojūt 2007. godā apstyprynuotūs Latgalīšu raksteibys nūsacejumus.

Nasaverūt iz tū, ka vairumam latgalīšu nav bejuse vareiba īsavuiceit sovys dzymtuos volūdys rokstu tradiceju, volūdai ir lela nūzeime gon kasdīnys saziņā, gon dažaiduos publiskuos aktivitātēs – tū var dzierdēt na tikai muzykā, bet ari reklamuos, kinuos i teatra izruodēs, skaitiet īlu nūruodēs, veikalu izkuortnēs i produktu nūsaukumūs, kai ari daudz kur cytur. 2011. gods tautys skaiteišonys dati ruoda, ka kasdīnā latgalīšu volūdu lītoj aptuveni 8,8% vaļsts dzeivuotuoju.

Portals lakuga.lv dorbojās nu 2007. gods, kasdīnys latgalīšu rokstu volūdā viestejūt par Latgolys i latgaliskuos kulturys dzeivis aktualitatem. Portala eipašnīks ir bīdreiba “Latgolys Studentu centrs”, lakuga.lv saturs itūšaļt teik sagataveits ar Vaļsts regionaluos atteisteibys agenturys finansialu atbolstu nu Latvejis valsts budžeta leidzekļu.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.