Roksta autors: Ināra Volkova, žurnals “A12”

Jaunys izstuodis Latgolys muokslys i amatnīceibys centrā, Leivuonā, suocās jau itūnedeļ, 12. i 14. decembrī. Līga Mickēviča pīduovoj austuos mandalys “Sajūtu saules”. Muokslineica pīzeist, ka mandalys ir cylvāka īškejuos byuteibys atainuojums iz itū šaļti.

“Mandalu ausšona ir na viņ dziļš dorbs ar sevi, meditaceja, bet tū var aust ari kaidys konkretys materialys vierteibys īgiušonai, pīmāram, ceļuojumam, olgys paaugstynuojumam. Aužūt mandalu, īlīkam dūmys i energeju par konkretū gribiešonu, tod kotru dīnu nūlīkam mandalu sev prīškā, pameditejam, padūmojam. Kod rezultats sasnāgts, mandalu var sadadzynuot.” Īsuokumā mandalys tyka zeimātys, tūmār Latvejā jau dorbojās ari austūs mandalu darbneicys, kas pamudynuoja Līgu pīsagrīzt austajom mandalom. Taipat kai zeimiešona, mandalu veiduošona ir ari psihologiska saruna pošam ar sevi. Daudzim sajiuta byut i atsarast ite i niu, ir juosavuica. I mandalu veiduošona ir ceļš pošam iz sevi.

Tradicionaluos tautys muokslys izpausmis ir Tautys Lītiškuos muokslys studeja “Dubna” tekstileju izstuodē “..raksti silda..”. Kerzis ar dzejs komulim, ausšonai pīteitys motkys, aust īsuokti deči, lyna goldauti, greidys celeni. Tautys lītiškuos muokslys studeja “Dubna” sagloboj i atteista senejuos ausšonys tradicejis, pietej Latgolai soveiguos senejuos rokstu zeimis i īauž juos myusdīneiguos tekstilejuos. “Dubnys” viesture suocēs 1972. godā ar audiejis Monikys Mančinskys īceri apvīnuot audiejis ausšonys pulceņā, nūsaucūt jū upis Dubnys vuordā. Studejis vadeituoja ir Inese Valaine, studeja atteista ausšonys tradicejis, pietejūt Latgolys ornamentus i īaužūt juos myusdīneiguos tekstilejuos. Studeja ir izauduse vaira kai 90 metrus garu tautysku jūstu, kū TLMS “Dubna” audiejis 2006. godā darynuoja Leivuona piļsātys 80 godu jubilejai i kas ir niule garuokuo austuo jūsta Latvejā.

Izstuodis apsaveramys da 26. janvara.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.