Apkūpuoja: Inga Čekša-Ratniece, žurnals “A12”

Rēzeknis Tautys teatris 60. sezonu suoce jau paguojušuo goda septembrī ar izruodi “Ačgārnās pasakas čemodānā”, kurys pamatā ir Džanni Rodari puorsokys, skateituojim pīduovojūt īpazeit sovaideibys golvonūs varūņu ceļuojuma laikā lidūstā. Teatra 60. dzimšonys dīnys svineibys plašuok planavuotys ituo gods aprelī i majā, i skateituojim byus vairuoki puorsteigumi.

Teatris navar byut bez sova skateituoja, ir juosajiut saikne ar jū, juobyun vajadzeigam i juo nūvārtātam, pretejā gadejumā – naasūt vārts dorbuotīs. “Ka mes stuovātu iz vītys, byutu garlaiceigi i nainteresanti,” nūruoda Rēzeknis Tautys teatra režisore Māra Zaļaiskalns. Juodasoka, ka teatrī spēlej vysaidu profeseju puorstuovi, i ari tei ir boguoteiba.

Atsaverūt iz teatra viesturi Rēzeknē, redzim, ka piļsātā pyrmais dramys puļceņš tyka nūdybynuots jau 1908. godā. Jimā dorbuojuos vītejuo inteligeņce, puorsvorā katuoļu lobdareibys bīdreibys kora daleibnīki, ari tierdzeibys školys pedagogi i audziekni. Puļceņš lelu viereibu pīgrīze i īstudēja Rūdolfa Blaumaņa i Ādolfa Alunāna dorbus. Teatris Rēzeknē tyka spieļuots vysūs laikūs. Pieckara godūs dorbuojuos latvīšu i krīvu dramatiskī puļceni, īstudejūt i klasiku, i padūmu autoru lugys, i ari operetis.

Miļzeiga lūma ir 1958. gods decembra spālātuos lugys “Lūzums” pyrmizruodei Reigys operetis teatrī, kurai pasateicūt, Rēzeknis dramatiskajam kolektivam 1959. gods janvarī tyka īdūts Tautys teatra nūsaukums, bet režisoram Ontonam Varslavānam – Nūpalnim boguotuo muokslys darbinīka nūsaukums. Tai pyrma 60 godu suocēs jauns pūsmys Rēzeknis teatra viesturē.

Režisore M. Zaļaiskalns par latvīšu trupys režisori palyka 1973. godā, izreiz piec Leningradys kulturys instituta pabeigšonys. Krīvu trupu suoce vadeit ari pīmynātuo instituta absolvents Igors Mihailovs. Piec treis godim krīvu trupa palyka par ūtrū tautys teatri, sovutīs 90. godu suokumā – par studejteatri “Joriks”.
Kotru godu Rēzeknis Tautys teatris Mārys vadeibā skateituojus ir lutynuojs ar jaunom i aizraujūšom izruodem. Par dažom vys daudzim ir spūdrys atminis. Kai vīns nu īvārojamuokūs īstudiejumu teik nūsaukta Ontona Rupaiņa komedeja latgaliskā gorā i latgalīšu mēlē “Dzymtō zeme”, jū Rēzeknis Tautys teatram izruodūt vysmoz 50 reizis vysā Latvejā. Pīvīnuotuo vierteiba Rēzeknei ir ari kotru ūtrū godu teatra reikuotais storptautyskais teatra festivals “Soli pa solim”. Paguojušajā godā tys ritēja jau dasmytū reizi.

Roksts sagataveits ar Vidis regionaluos atteisteibys agenturys finansialu atbolstu nu Latvejis budžeta leidzekļu projektam “Sabiedrības un reģionu robežlīnijas žurnālā A12”.