Roksta autore: Gunta Ločmele, portals lakuga.lv

Runojūt par Latgolys atteisteibu, kai vīnu nu leluokūs problemu sociologi i ekonomisti miņ cylvāku aizbraukšonu nu regiona. Pošvaļdeibys i navaļstiskuos organizacejis rauga nūturēt jaunīšus regionūs, motivejūt i snādzūt atbolstu uzjiemiejdarbeibys suokšonai. Tok par lobu palikšonai Latgolā ci atsagrīzšonai spielej ari cyti motivi. Kab dazynuotu, kas motivej jaunīšus atsagrīzt Latgolā, portals lakuga.lv izvaicoj treis mārgys, kurys piec studeju i dorba dzeivis Reigā atsagrīzušys Latgolā.

MARTA LOČMELE auguse Kuorsovys nūvoda Saļņovā. Pamatizgleiteiba i videjuo izgleiteiba Martai ir dabuota ite pat – Latgolā, bet augstuokuo – bakalaura grads muokslā – Latvejis Kulturys akademejā Reigā. Piec studeju Marta apzynuotai izavielēja dabuot dorba pīredzi Reigā, godu jei nūstruoduoja uzjāmumā “MTG” par reklamys planavuotuoju.
“Niule struodoju “Rēzeknes Gaļas kombinatā” par marketinga nūdalis vadeituoju,” stuosta Marta Ločmele. “Jau studejūt, zynuovu, ka braukšu atpakaļ. Man pateik lauki i doba. Ite ir vysjaukuokī cylvāki. Lāmums atsagrīzt nūteikti beja saimis i draugu deļ. Itymā šaļtī jiutūs labi! Vyss, kū planavuoju, pagaidom pīsapylda. Ka pats dareisi i vysu laiku byusi kusteibā, tod ari nuokūtne byus skaidra. Golvonais – justīs laimeigi!”

Marta ir ari sabīdriski aktiva, breivajā laikā doncoj Saļņovys jaunīšu deju kolektivā, spielej volejbolu, organizej sportiskys aktivitatis, kai ari Marta ir vīna nu pruota spieļu “Aļberts” idejis autorim i organizatorim.

Ari DIĀNA BALALAIKINA ir nu Kuorsovys. Jei absolviejuse Juoņa Ivanova Rēzeknis Muzykys vydsškolu, bet Reigys Pedagogejis i izgleiteibys vadeibys akademejā Diāna dabuojuse bakalaura gradu izgleiteibā i suokumškolys školuotuoja kvalifikaceju. Pyrmuo pīredze dorbā ar bārnim Diānai beja, divus godus struodojūt vīnā nu Reigys bārnuduorzu: “Tys beja breineigs laiks jaunai pīredzei. Vyss beja jauns, interesants, izpaleidzeigi kolegi.”
Jaunīte atzeist, ka golvyspiļsātys pīredze paleidz ari pošlaik. Latgolā Diāna atsagrīze pyrms vairuoku godu i turpynoj struoduot izgleiteibys nūzarē, byudama suokumškolys školuotuoja i pedagoge-karjerys konsultante Daugovpilī.

“Reigā, zynoms, ir daudzi īspieju,” soka Diāna, “Tok vysod asu zynuojuse, ka muna sirds pīdar munai dzymtajai vītai – Latgolai. Nui, ite gryuts atrast dorbu, eipaši mozuos piļsātuos ci pogostūs, partū saīt dzeivuot tī, kur ir dorbs.”

Runojūt par nuokūtnis perspektivom, Diāna pastreipoj, ka školuotuojam byus dorbs, cikom byus bārni: “Lobuokais veids, kai veicynuot atteisteibu Latgolā, ir pošim ite dzeivuot, audzynuot sovus bārnus, baudeit breineigūs dobys skotus i aktivi īsasaisteit sovys dzimtinis atteisteibā. Es doru tū, kas maņ pateik, doru nu sirds i asu laimeiga, saucūt Latgolu par sovu sātu!”

DIĀNYS CELITĀNIS dzymtuo puse ir Kruoslovys nūvoda Izvolts. Piec Daugovpiļs Universitatis absolviešonys Diāna nūbrauce iz Reigu, kur nūstruoduoja godu i izlēme atsagrīzt Daugovpilī. Niu Diāna Celitāne struodoj par bibliotekari Bārnu bibliotekā i breivajā laikā doncoj Daugovpiļs Latvīšu kulturys centra deju kolektivā “Laismeņa”.
“Latgolā ir mīreiguok, syltuok i vairuok mīlesteibys! Latgolā radzu prīceigu dzeivi i personeibys atteisteibu,” par sovu atsagrīzšonu soka Diāna.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.